Youq ndaw rangh bya lueg laeg miz aen mbanj iq ndeu, ndaw mbanj cijmiz ngeihcib lai hoh, bak lai vunz, ranz gwnz ranz laj, ranz laeng ranz naj cungj dwg beixnuengx caencik.

Aungeih couh dwg vunz ndaw mbanj neix. De gaenq loegcib lai bi lo. Yienznaeuz de gaenq baenz goeng miz lwglan lo, hoeng gyoengqvunz ndaw mbanj lij heuh de guh Aungeih. Dingq vunz ndaw mbanj gangj, ei banboiq roengzdaeuj, de dwg ban au, youh dwg lwg daihngeih, yienghneix, vunz couh heuh de guh Aungeih, doeklaeng itcig heuh daengz seizneix.

Aungeih haengj bang vunz. Ndaw mbanj ranz lawz miz maz saehhoj, cijaeu bang ndaej, Aungeih cungj caenhrengz bae bang.

Aungeih dwg ndaw mbanj boux miz sawmaeg ndeu. Aungeih lij iq, dwg boux vunz haengj doegsaw ndeu. Doeg siujyoz seiz, cingzcik couh gig maenhndei, ciengzseiz ndaej lauxsae haenh. Danghnaeuz mbouj bungz daengz haeuxgwn gaenjciengq aen seizdaih haenx, Aungeih ndaej doegsaw hwnjbae, itdingh baenz boux okrog gwn ngaiz guekgya ndeu. Hojsik lai, aenvih dingjlingz bungzdaengz seiz hoj, ndaw ranz mboujmiz cienz gung de doegsaw, Aungeih cix doeg rim siujyoz couh ma ranz guhhong ra gwn lo.

Mbwndeih mbouj hojlienz, vunz gag haenqrengz guh. Yienznaeuz Aungeih ma ranz guhhong ra gwn lo. Hoeng, Aungeih lij soqlai mbouj vut saw bae. De banngoenz guhhong, banhaemh couh youq laj daengyouz haeujsim yawj saw, gag hag rox haujlai saw, baenz boux vunz miz vwnzva lajmbanj ndeu. Aungeih gaenx hag miz vwnzva riuz daengz ndaw dadui, dadui ganbu couh daeuj daengz ranz Aungeih ra Aungeih gangjvah, naeuz ndaw dadui ngamq laebbaenz aen giyez ndeu, gunghse faen aen cunghhingz dohlahgih ndeu hawj dadui giyez, seizneix siengj ra bouxcoz miz vwnzva ndeu bae hag hai dohlahgih, ginggvaq dadui ganbu doxyaeng, gietdingh hawj de bae ndaw yienh hag, Aungeih dingq le angq raixcaix, sikhaek doengzeiq lo. Youq ndaw yienh hagsib hai ci seiz, aenvih Aungeih gaenx hag gaenx lienh, gig vaiq couh rox hai dawz dohlahgih lo.Yienghneix Aungeih youq ndaw dadui de baenz boux daih’it rox hai dohlahgih.

Aungeih hag baenz dauqma, youq ndaw dadui hai ndaej saek cib bi dohlahgih, dingjlingz youh bungz daengz gaijsanq dadui giyez. Yienghneix, dadui youh heuh Aungeih bae hag canghyw. Aungeih dingq dadui anbaiz, mbouj gangj saek coenz. Seizhaenx, Aungeih ndawsim siengj: Mbouj hai dohlahgih gaij hag canghyw, lai hag lai rox, lai miz bonjsaeh cungj mbouj loek. Couh yienghneix Aungeih youh bae ndaw yienh hag canghyw lo. Aungeih hag canghyw dauqma, youq ndaw dadui hainduj bang vunz yawj bingh yw bingh. Baeznaengz bingh mbaeu bingh nyaeq, ndaej Aungeih roengz yw, bingh cungj ndaej yw ndei. Yienghneix, vunzmbanj cungj haengj hawj Aungeih yw bingh, haenh de dwg boux canghyw ak ndeu.

Cix dwg mingh Aungeih mbouj ndei, cingq youq Aungeih ywbingh lai miz mingzdaeuz, hong ywbingh yied guh yied hoengh seizhaenx, Aungeih caiq vut bae gij hong de. Baezneix, mbouj dwg dadui veiswnghsiz gajjsanq, dwg aenvih Aungeih famh “seng lwg lai” aen cwngcwz neix, deng doiq maranz.

Youq rog buekmingh geij cib bi, ranz Aungeih mboujdanh mbouj fouqmiz, dauqfanj aenvih ciengzgeiz youq baihrog, mbouj ndaej goq ndaw ranz, ranz Aungeih mizdi gungzhoj. Hoeng, Aungeih mbouj doeknaiq saek di, de caeg roengz gietsim, doenggvaq goengrengz swhgeij gaijbienq ndaw ranz saedceij gungzhoj. Yienghneix, Aungeih itmienh laemxrengz guh hong nazreih, itmienh lij guh gij hong canghyw de. Dauq mbouj dwg Aungeih lij guh gij hong canghyw daeuj canh cienz bienq fouq, Aungeih siengj guh hong canghyw, it dwg hawj bouxlaux lwgnyez ndawmbanj yawj bingh fuengbienh, ngeih dwg mbouj hawj gij bonjsaeh hag ndaej haenx lumz bae. Daj Aungeih ma ranz le, ndaw mbanj baez miz bouxlaux lwgnyez miz di bingh, gyoengqde cungj mbouj yungh bae baihrog yawj bingh aeu yw lo, cijaeu Aungeih yw ndaej, de cungj caenhrengz bang yw, moix baez cij aeu ngaenzbonj cienzyw. Couh yienghneix, vunz ndaw mbanj yied daeuj yied gyaez Aungeih, gig aeueiq de, baez raennaj, cungj dwg heuh Aungeih bae Aungeih daeuj. Aenvih Aungeih gaenx hong, bouxvunz rox suenq, miz ukgyaeuj loengh cienz, caiq dem gyoengqlwg Aungeih gaenq maj hung gag rox ra gwn lo, ndigah, ranz Aungeih yied ngoenz yied ndei hwnjdaeuj lo.

(caengz sat)