Moix bi liggaeuq ndwenngux cibsam, Cingsih Yen Lungzbangh Cin Gailungzbangh cungj hoengh banh ciet yisuz vwnzva conzdungj fungsug ndawbiengz; ngoenzneix caemh dwg Gailungzbangh ngoenz- ciet caeqbaiq geiqniemh Gvanh Yij boux ciengginh gyaez guek mizmingz seiz Sanhgoz neix baenz cax gyaep sez rex cingq ndeu. Ngoenzciet, vunzlai dangdieg caeqcuengq “saenz Gvan”, niemhngeix gij goenglauz hungmbwk de, cienzyiengz gij vwnzva conzdungj maenhndei minzcuz. Ngoenz neix, dangdieg caemh guh gij doxdax dwkdomq、doiq fwen、ciengj bauqva doenghgij hozdung dijyuz conzdungj ndaw- biengz neix, baenz geij fanh vunzlai dangdieg、gij yienh henzgyawj caeuq vunz henzguek Yeznanz comz daengz Gailungzbangh, angqyangz gvaq ciet, youq hozdung ndawde swnjcienz gij yisuz vwnzva fungsug ndawbiengz.

Ngoenzciet, cawz guh doxdax dwkdomq、doiq fwen、ciengj bauqva sam daih hozdung conzdungj neix le, lij miz diuq fouxvenz Myauzcuz、bengcag、dwklwggyangq、dwkcik、bin faexsaux、nyingz naq doenghgij doxdax mizyinx neix dem, vanzlij miz vwnzyidui dangdieg yienj gij heiq gag bien gag yienj haenx dem, hozdung lai cungj lai yiengh, hawj vunzlai humx dwk yawj comz dwk dingq, ciengzmienh nauhyied hoenghhwd. Mwngz dingq, gij fwen Ya’gyaz riuz youq henzguek Cungh Yez song guek neix, coenz fwen raeuzrad dawzbak, okbak baenz hot, hothot dawzyinh, miz cingz miz eiq, sengdoengh yinx vunz; mwngz yawj, gizdieg dwkdomq, mbauqsau faenbied ndwn youq boux mbiengj, mwngz bau gou ciep, aendomq hwnjroengz baedauq, gij cingzndiep caemh riengz aendomq doek haeuj fwngz mbauqsau con haeuj sim mbauqsau; caiq yawj ciengz ciengj bauqva, betcib baenz bak boux daegmbauq mwngz ciengj gou dued dwk buekciengj mbouj dingz, vunzlai humx dwk caengz dem caengz ndaetndi bekfwngz hemq gyayouz, yinx gij vunz diegwnq caemh caenx daeuj yawj, sing riu sing hemq goksad gyukgyad, gwnz naj gyoengqvunz cungj lumj va hai nei hoengzmaeq ronghlwenq, daengx diuzgai caenh caemx youq ndaw angqyangz vuenyungz.

Doenghbi neix daeuj, Lungz- bangh Cin dangjveij cwngfuj baengh gij ndeicawq youq dieg henzguek caeuq vwnzva naekna de, haenq- rengz cimhra、swnjcienz caeuq cienzyiengz gij vwnzva conzdungj maenhndei ndawbiengz, caemhcaiq aeundaej cingzcik yienhda. Bi 2012, aen cin neix dawz dwkdomq、fwen Ya’gyaz caeuq ciengj bauqva sam hangh neix cigciep bauqaeu swcigih、guekgya gaep feihvuzciz vwnzva yizcanj baujhoh hangh- moeg.