Gaijgwz hailangh geijcib bei(bi), lwgminz vuenheij gvaq ndwenngoenz; cwngcwz dangj ndei beksingq haenh, gwndaenj vaiqvued fanh bei raez.”“Lwgminz Mauznanz ciengq beij moq, sai- mbwk lauxcoz cungj angqyangz; gwn ndei youq ndei raeuz baengh dangj, diuzroen siujgangh gvangqliuliu.”

9 nyied 7 hauh daengz 8 hauh, Vanzgyangh Mauznanzcuz Swciyen youq yienh vwnzdijgiz hai hoihfwen, angqhoh ciet bet nyied cibngux. Song hot fwen gwnzneix couhdwg canghfwen Danz Yenli youq gwnz daizfwen eu haenx.

Baez hoihfwen neix, dwg Vanzgyangh Sanhgoh Hezvei laebbaenz le banh aen hoihfwen ceiq hung ndeu. Daengx yienh 12 aen yangh cin cungj senj canghfwen daeuj camgya, gungh miz 90 boux canghfwen daeuj camgya eu fwen. Gvangjsih Sanhgoh Yozvei veicangj Cinz Siengzcouh cienmonz daj Nanzningz daeuj camgya aen hoihfwen hoenghhwd neix, de youq gwnz hoihfwen haenh Vanzgyangh guh hong fwen senhconz guh ndaej ndei, saimbwk lauxcoz cungj maij eu fwen, de lij eu fwen hoh aen hoihfwen neix.

Youq gwnz daizfwen, gyoengq boux canghfwen Mauznanzcuz、Bouxcuengh、Bouxgun、 Suijcuz、 Buyihcuz daengj cungj angq dwk eu fwen doiq fwen. Boux canghfwen nienzgeij ceiq geq dwg Cinz Haijbinh daxbuz, de gaenq 83 bi, de youq gwnz daiz mboujdanh eu fwen, lij byaujyenj vaiqbenj dem, ndaej daengz daengx ciengz vunzlai dopfwngz haenh ndei. Baez hoihfwen neix, neiyungz fwen dwg haenh Vanzgyangh gyaeundei 、haenh lwgminz gaendaenj vuenyungz、gaenxguh baenz fouq、ciet bet nyied cibngux siengjniemh beixnuengx baengzyoux daengj. Aenvih neiyungz fwen moq, sing canghfwen youh ndeidingq, ndigah, daengx aen hoihfwen sing hemq sing bekfwngz mbouj dingz mbouj duenh, nauhyied dangqmaz.

(Veiz Yennaz/韦愿娜)