“Bibi youq ndwenseiq, lauxnyaeq angq doxcomz; saulengj daenj buhromj, gaem laeuj guenq daegmbauq……”Hot fwen neix dwg bouxgijyinz Bouxcuengh mwh doenghbi Daugvangh Ciuhcingh raizsij ciethawfwen yienh Lungzcouh ndeu. Moix bi liggaeuq ndwenngeih daengz ndwenseiq, gak cuz beixnuengx ranghdieg Lungzcouh caiqlij miz gyoengq mbauqsau guek Yeznanz dem, daj seiq fueng bet baih caenx haeuj hawfwen yienhsingz Lungzcouh roxnaeuz Ginhlungz Cin doenghgij yanghcin haenx bae, eu fwen dingq fwen, gyau youx damz cingz, yawj yienjheiq caeuq guh dijyuz doxdax, daengx aen hawfwen sing fwen haprwenz, sing riu goksad, hwnz- ngoenz mbouj dingz.

Ciuq sawgeq geiq naeuz, gij hozdung hawfwen yienh Lungzcouh caeux youq seiz Ciuhsung couh hwnghoengh, daengz seizneix gaenq miz it cien lai bi lizsij, daengx yienh miz baenz 250 lai giz hawfwen hunghung iqiq haenx, dingzlai dwg youq moix bi liggaeuq ndwenngeih daengz ndwenseiq seiz cin raeuj va hai neix hoengh banh. Ndaw yienh Lungzcouh aen hawfwen ceiq hung ceiq hoengh de dwg ciethawfwen liggaeuq ndwenseiq cibsam youq yienhsingz banh haenx, ngoenzneix caemh dwg “ngoenzseng fuzboh”. Ciuq lwnh naeuz, liggaeuq ndwenseiq cibsam dwg ngoenzseng boux fuzboh ciengginh okmingz Maj Yenz Ciuhdunghhan, seizhaenx Maj Yenz daiq bing daeuj baihnamz guek raeuz humx hoenx fanjluenh seiz youq Lungzcouh capbing gvaq, doiq henmaenh henzguek、haifat henzguek laeb roengz goenglauz hung, vunz Lungzcouh vih geiqniemh de couh hwnjguh le “Miuh Fuzboh”, caemhcaiq dingh youq ngoenzneix bae naj miuh guh caeqbaiq hozdung, doiq fwen yienjheiq, foux lungz foux saeceij, cuengq daengdah, nauhyied dangqmaz. Ndaw yienh Ginhlungz Cin、Sanglungz Yangh、Sangginh Yangh caeuq Mbanjminzgen、 Mbanjgo’gyap daengj 20 lai aen gwnzhaw lajmbanj, moix bi cungj guh gij hozdung hawfwen conzdungj vunzlai gyaez dingq maij yawj de, gyoengq mbauqsau doiq fwen ra youx, gangj cingz dwen ndiep, gyoengq vunzlaux cix youq ngoenzciet heuh geij boux hujgeiq, naengh henz daiz caez gwn laeuj, lwnhgangj gij saedceij diemzvan de, maqmuengh dajndaem dajciengx ndaej demsou. Gyawj geij bi neix daeuj, gyoengq vunzlai Lungzcouh lij hwng guh aeu dienhvah caeuq soujgih ma doiq fwen, bak humz sim haenz siengj eu fwen couh dwk dienhvah ra doih, gek singz gek mbanj dwk hai bak “byonghmbwn doiq fwen” hwnjdaeuj, cungj hingzsik daegbied neix lij cienz daengz le gyoengqvunz youq dep henzguek Cungh Yez haenx, humx dingq gij “fwen byonghmbwn” hamj gyaiq gvaq guek neix, vunzlai caemh roxnyinh mizyinx raixcaix. Ngoenzciet, gwnzhaw lij baijdan deihdaendaen, gai huqdoj dangdieg, guh faengxgaeuvaiz、faengxraemxndaengq、haeuxnaengj haj saek、ceizet lai saek doengh gijgwn gig miz daegsaek dangdieg neix hawj bouxhek cimz gwn, caiq cawx saek di daiq baema hawj vunz ndaw ranz roxnaeuz baengzyoux caez gwn, caemh haengjheiq angqyangz dangqmaz.