Dahcej yienznaeuz nienzgeij lij oiq, hoeng de mboujdanh rox ciengqgo diuqfoux, lij rox benz faex dem, maenh lai lo.

Cawzhah daengz lo, makdauz cug lo, daj gizgyae cungj mup daengz gij rang de. Ngoenz haenx, gou caeuq yahdaiq cingq nyaengq dwk mbaet makdauz, gij makdauz maj youq gizdaemq haenx yungzheih mbaet, maj youq nyefaex sang haenx baenzlawz vax cungj mbouj dawz.

“Yahbuz, gou daeuj bang mwngz!” Raq singriu he daj baih- laeng cienz gvaqdaeuj, yienzlaiz dwg dahcej. Yahdaiq ngeiz dwk cam:“Lan ha, mwngz miz maz banhfap ne?”

“Benz faex!” Gangj sat, couh raen dahcej got dawz gomak, lumj duzlingz nei “fwt” couh benz hwnj gwnz gofaex bae.

Yahdaiq gipmuengz naeuz:“Lan ha, siujsim bw, gaej doek roengzdaeuj!”

Seizneix, dahcej diem din yaengx fwngz, cingq siengj mbaet makdauz. Aenvih makdauz maj youq rieng nye, dahcej baenzlawz cungj aeu mbouj ndaej, baez he, song baez, sam baez……Mwh dahcej youhcaiq siengj bae mbaet makdauz seiz, lajdin cix caij mbouj dawz nyefaex……Caen yungyiemj! Caenh raen dahcej lingzsingj dwk got dawz gofaex, “bungz” sing he, onjdaekdaek naengh youq gwnz ngafaex.

“Aeyo!” Yahdaiq doeksaet yat, gip dwk hemq: “Vaiqdi roengzdaeuj, roengzdaeuj, mbouj aeu lo!”

“Mbouj miz saeh law, yah- buz.” Dahcej yawj coh yahdaiq riugekgek.

Haxbaenh ngaiz hit le, dahcej siengj ok aen banhfap wnq. De caij youq gwnz nyefaex, hawj nyefaex goz le caiq hawj yahdaiq bae mbaet aenmak, yienghneix makdauz couh yungzheih mbaet lo.

Dahcej gou rox benz faex, dwg mbouj dwg gig geizheih ha?

(seiq nienzgaep Cau Yinzfeih)