Moix bi liggaeuq ndwenseiq ngeihseiq, Yungzsuij Myauzcuz Swciyen Hozmuz Cin cungj banh aen cietbauqva gig hoenghhwd ndeu, baenz bak boux bouxcoz bouxcangq sai lohgenz bae buek ciengj sam aen bauqva raek miz gij eiqsei fuk luk gyaeu angq、dang’hak fatcaiz、lwglan baenzbang haenx, vanzlij banh miz gij hozdung vwnzyi biujyienj caeuq dijyuz doxdax lai cungj lai yiengh haenx dem, nauhyied youh ndeiyawj, yinx baenz geij fanh vunz dangdieg Yungzsuij caeuq bouxhek Liujcwngz、Yungzanh、Lozcwngz doenghgij yienh henzgyawj neix nem mbangj hekyouz ndaw guek rog guek bae humx yawj, gwnz haw iq vunz lai vunz daih, nauhyied dangqmaz.

Gij goekgaen cietbauqva Hozmuz Cin caeuq gij cietbauqva diegwnq mbouj doxdoengz, cietbauqva aen cin neix dwg laeb daeuj geiqniemh Maj Yenz boux fuzboh ciengginh ciuh Dunghhan neix. Riuznaeuz, seiz Gvanghvuj dang vuengzdaeq Dunghhan, Maj Yenz bae hoenx fanjluenh baihnamz seiz, mboujguenj bae daengz gizlawz, cungj youq gizde laebguh sengjyienh、ceihleix saeh singzmbanj、hai mieng dwkraemx, soncienz gij gisuz ndaemganq senhcin dieg Cunghyenz, hawj gizdieg fwzsaengx gungzndoq henzguek baihnamz neix saedceij ndaej gaijndei, vunzlai dangdieg vih geiqniemh gij goenglauz hung gouq guek gouq minz Maj Yenz, couh youq liggaeuq ndwenseiq ngeihseiq (riuznaeuz dwg ngoenzseng Maj Yenz) angq gvaq cietbauqva, itcig cienz daengz seizneix.

Ngoenzciet, Hozmuz Cin banh miz lai cungj lai yiengh hozdung. Gaihmusi hai sat le, daengx gyoengqvunz bae youzbyaij, doih foux saeceij、doih ram siengq Maj Yenz、doih gyaeujbauqva doenghgij doih doxdax、doih biujyienj neix foedfoed nanghnangh byaij gvaq gwnzgai, vunzlai caenx youq song henz gai humx yawj ndaetfwdfwd, sing bauqrengh sing hemq sing riu mbouj dingz mbouj gat. Ma daengz hoihciengz le, gak doih couh doxlwnz dwk guh biujyienj, ciengq caijdiu、Heiqgvei, eu fwen, foux lungz foux saeceij doenghgij cezmuz neix hawj vunzlai yawj dwk maezmwd; bengcag、dwklanzgiuz doenghgij dijyuz doxdax neix hawj bouxyawj angq hemq gyayouz mbouj dingz. Daegbied dwg ciengz heiq ciengj bauqva ceiq nauhyied neix hainduj le, gyoengq bouxcoz bouxcangq youq gwnz ciengz mwngz ciengj gou dued haenqhwd dwk ciengj aengengxdiet, gyoengq bouxyawj youq henz caemh caez hemq dwk bekfwngz dwk, daihgya hemq ha ciengj ha, dawz cungj cingsaenz buek guh、faenh simcingz cuengqsoeng ndeu yienh okdaeuj seuqsat.

Ngoenzciet, daengx aen haw iq caem youq ndaw angqyangz, cigdaengz haetlaeng ranz yaek rongh, vunzlai cij menhmenh sanq baema, gij nauhyied hoenghhwd de gyawjgyae mizmingz.