Digiuz dwg meh raeuz, de sengmaj gij gwn gij yungh hawj raeuz, hawj raeuz ndaej ciengx mingh. Raeuz cij miz aen digiuz ndeu, hoeng raeuz mbouj rox insik, lij seizbienh buqvaih de. Lumjbaenz luenh raemj faex, baiz raemx uq heiq doeg……

Gaenh geij bi daeuj, digiuz cugciemh bienq raeuj, daengx seiqgyaiq vunz cungj gvensim aen vwndiz neix. Dihdan swnghhoz baenz cungj swnghhoz fuengsik seizneix sevei gig seizhwng ndeu, de lumj raq rumz hung ndeu ci haeuj moix gya moix hoh. Ranz gou gig ganj seizhwng, ngoenznaengz sawjyungh raemx dienh daengj cungj mbaet lo. Gou roxyiuj, ndiepgyaez digiuz daxmeh aeu daj saeh iq henz ndang guh hwnj.

Gou geiq ndaej youq seizhah, dienheiq ndat lumj lozfeiz, gwnz dieg lumj feiz coemh, gou caeuq daxboh daxmeh ndoj youq ndaw ranz hai gunghdiuz, daxboh dawz vaendoh diuz daengz 24 doh, gou naeuz:“Boh, gven gunghdiuz ba, miz denfunghsan couh ndaej lo.” Daxboh haenh naeuz:“Mwngz caen dwg boux lwgyez rox mbaetyungh ndeu.” Daj neix hwnj, ranz gou couh gig mbaet dienh lo.

Lij miz baez ndeu, gou yawjraen daxboh hwnq congz le, couh naeuz: “Boh, raeuz ngoenzneix bae baihrog gwn haeuxromh ndei lwi?” Daxboh naeuz:“Ndei, neix raeuz yaek hai ci bae roxnaeuz byaij bae?” Gou naeuz: “Byaij bae ba, yienghneix ndaej yawj funggingj hix ndaej lienh ndangdaej, eng youqgaenj dwg mbouj sai giyouz baiz heiq uq.” Daxboh riunyumnyum ngaek gyaeuj naeuz:“Lwg gou caen roxsoq lai lo!”

Mbat ndeu meh gou cat haeux le yaek boek gij raemxhaeux deuz, gou gipmuengz rag fwngz de naeuz:“Meh, bat raemx neix aeu daeuj rwed va ba! Caiq naeuz raemx cat haeux lij miz yingzyangj ne!”Daxmeh riu naeuz: “Lij dwg lwg gou gvai ha.” Daj seiz haenx hwnj ranz gou raemx cat haeux cungj louz roengzdaeuj.

Caiq miz mbat ndeu, gou yawj raen daxbuz dumq gyaeqgaeq, raemx goenj mbouj nanz couh gven feiz lo, gou geizheih cam naeuz:“Daxbuz, gyaeqgaeq caengz cug, mwngz vihmaz gven feiz?” Daxbuz naeuz: “Gyaeqgaeq caet faen cug youq ndaw raemx goenj oemq song faen cung couh ndaej lo. Yienghneix cawj gyaeqgaeq youh noix feiz youh ndeigwn.” Buz gou caen mbouj loek!

Miz ngoenz ndeu, ranz gou hai aen hoih ndeu, cujyau lwnh baenzlawz mbaet yungh nwngzyenz, caezgya cungjgez ndaej haujlai banhfap ndei, lumj: (1)ndaw ranz aeu vuenh ceznwngz dwnghbauh; (2) baedauq byaij roen caenhliengh mbouj hai ci; (3) aen ci baujciz lwnzdaih giyaz habngamj, aenvih giyaz noix coemh giyouz lai; (4) noix yungh ceij, noix yungh gij dawh cij sawj baez ndeu haenx;(5) raemx swiq din swiq naj mbouj yungh cawj goenj, noix sai feiz ;(6) dep conghcueng sij cozyez mbouj yungh hai daeng; (7) mbaet yungh ceij, sij cih suenq soq aeu song mienh sij caez; (8) buhvaq daenj dinj le louz hawj nuengx roxnaeuz soengq vunz…….

“Yienghneix cij dwg dihdan swnghhoz.” Daxmeh naeuz. Daxmeh dawz gij fuengfap baihgwnz dajyaenq okdaeuj, naeuz mbatlaeng raeuz couh ciuq yienghneix bae guh.

Couh yienghneix raeuz daengx ranz bouxlaux bouxcoz cungj byaij haeuj ndaw dihdan swnghhoz lo.

Dihdan swnghhoz dwg cungj daidu ndeu, raeuz wnggai daj noix yungh dienh、noix yungh raemx、noix yungh youz、noix yungh heiq daengj gij saeh iq neix guh hwnj, caemhcaiq guh gvenq roengzbae.

Dihdan gvenlienz daengz haujlai doxgaiq, dihdan swnghhoz gojyij mbaet haujlai naengzyenz, hix ndaej gouq daxmeh raeuz——digiuz.

Gyoengq doengzhag, hawj raeuz bouxboux hengzdoengh hwnjdaeuj, fwngz iq rag fwngz hung, doengz caux cezyozhingz sevei !

(指导教师 班珠莲)