7 nyied 27 hauh banhaemh, vujdaiz hung Sanghaij daeng ndongqmyanmyan, sing go goksat, Sung Ginglingz Ciengjyozginh Banhciengj Yizsi caeuq 2014 Nienz Sanghaij Gozci Saunenz Wzdungz Vwnzva Yisuzcez haimuq yizsi doengzdaiz gawjhengz, dah sau iq he daenj buh Bouxcuengh cingq youq gwnz daiz ciengq diuz go gingq laeuj Bouxcuengh 《Cenjcenj Laeuj Cungj Diemz》,sing go de youh sek youh diemz, daengx ciengz vunz dopfwngz roebroeb. Dah neix couhdwg Vujmingz Yen Daibingz Cin Gingloz Siujyoz roek nienzgaep hagseng Loz Yinghvaz, de aeundaej Gaiq Daih Cib’it Sung Ginglingz Ciengjyozginh, boux dog daibyauj gyoengq boux ndaej ciengjyozginh bae camgya banhciengj yizsi.

2002 nienz 9 nyied 8 hauh, Loz Yinghvaz seng youq Vujmingz Yen Daibingz Cin Vwnzdanz Cunh Mbanjdilingz ranz boux guh reihnaz he. De daj iq couh gyaez ciengq gyaez diuq, mwh roek bi seiz, yienznaeuz ndaw ranz mbouj fouqmiz, hoeng meh de ngoenznaengz hai dienhdanci soemh fwn soemh rumz soengq de daengz yienhsingz lienh diuqfoux. Mwh roek bi buenq, de haeuj Gingloz Siujyoz doegsaw, youq hagdangz, de hag Sawgun hix hag Sawcuengh, gaenx hag dangqmaz.

2008 nienz, Gingloz Siujyoz laebbaenz “Lwg Gingloz” Yisuzdonz, ndaw bi neix, yisuzdonz daibyauj Daibingz Cin camgya Vujmingz Yen Hawfwen “Sam Nyied Sam” Doxdax aeundaej mingz daih’it, okmingz lo. Loz Yinghvaz dwg boux cawjciengq, sawqmwh miz haujlai vunz roxnaj de. 2012 nienz yisuzdonz ndaej iu camgya Nanzningz Gozci Minzgoh Yisuzcez biujyienj.

Loz Yinghvaz yied hag yied siengj hag, de youh baiq canghfwen Vujmingz Vangz Genhungz、vwnz- va’gvanj nyuenz gvanjcangj Vangz Denhhwngz、fwenvuengz Bouxcuengh Mungz Suijswngh guh lauxsae. Ndaej gyoengqde son le, Loz Yinghvaz engq ak lo, de dang le “Lwg Gingloz”Yisuzdonz donzcangj. Gvaqlaeng, de caeuq caezgya doengzcaez okrengz, yisuzdonz aeundaej haujlai ciengj:2012 nienz MTV 《Angq Daengz Seiqgyaiq Gak Dieg Bae》aeundaej Gaiq Daihgouj Daengx Guek Cungh Siujyoz Hagdangz Yingjsi Cozbinj Ndei Bingzbeij gimciengj; 2012 nienz camgya Daengx Gih Siujhagseng Byauhcunjyij Caizyi Biujyienjsai《Daengngoenz Benz Hwnj Bya》aeu ndaej it daengj ciengj……

De yied maj yied hung, engq gyaez vwnzva Bouxcuengh lo, Sawcuengh hix yied hag yied ndei, gij cozvwnz de aeu Sawcuengh sij haenx ndaej daeng youq Gvangjsih Minzcuz Bau;2011 nienz bien cozvwnz 《Aen Ciet Vaiqvued》 aeundaej Daengx Gih Sawcuengh Cozvwnz Doxdax ngeih daengj ciengj; 2011 nienz aeundaej Daengx Gih Siujhagseng Vahcuengh Gangj Gojgaeq Doxdax it daengj ciengj……

Youq ndaw hagsib, Loz Yinghvaz gak monz goq cingzcik cungj ndei, de daibyauj hagdangz camgya Yinghyij、Sawgun gak cungj doxdax haujlai baez cungj aeu ndaej ciengj. De lij lai baez ndaej bingz guh Nanzningz Si “sam ndei hagseng” caeuq youhsiu sausenhduiyenz.

Yienznaeuz aeu ndaej gak cungj gak yiengh ciengj, hoeng Loz Yinghvaz lij dwg giemhaw roxsoq, gingqgyaez lauxsae, caeuq doengzhag doxndei. De simndat simndei, doengz- hag hagsib bungzdaengz gunnanz, de cungj haengj bang. De lij dang banhgan、 hagdangz sausenhdui daduicangj dem, yienznaeuz nyaengq, hoeng de guh hong hagsib cungj anbaiz ndaej ndeilili.

“Gou dwg lwg Bouxcuengh, gou siengj swnjcienz vwnzva ndei Boux- cuengh raeuz, hawj engq lai vunz daeuj ciengq fwen raeuz, roxnaj vwnzva Bouxcuengh raeuz miz yinx, hawj vwnzva raeuz ndaej daih cienz daih cienz roengzbae!” De yenjgyangj seiz baenzneix gangj, sim de caen dwg baenzneix siengj. Seizneix, dah sau iq Bouxcuengh neix cingq haenqrengz bae gyaep aen moenghsiengj de.