De naemj, vunzguhnaz baenzneix dwgrengz, aeu gwn imq cij ndaej bw. De faenbied ra vunzguhnaz daeuj doxging, liujgaij daihgya baenzbi aeu geijlai haeux, heuh gyoengqde ranzranz cungj gangj gij cingzgvang vunzranz、vunzguhhong bonjfaenh okdaeuj, seiznyaengq aeu gwn geijlai, seizhoengq youh gwn geijlai, ranzranz cungj aeu geq soq seuq bae. Daihgya cungj gangj, bouxlaux lwgnyez daengx ranz vunz bingzyaenz moix vunz aeu ndaej 600 gaen haeuxgok cij cengq- gengz gaeuq gwn, doenghbaez gvidingh, vunz bi louz haeuxgwn mbouj ndaej mauhgvaq 480 gaen, yienghneix mbouj gaeuq gwn ha, caemhcaiq lai ok haeux youh mbouj ndaej lai gwn, vunzcungq miz yigen. De youh ra gangu gunghse doxging, ra gyoengq boux gunghcozdui doxyaeng, caeuq goengdaeuz yenveij doxngeix, doeklaeng dingh naeuz: Vihliux gujli vunzguhnaz lai ok haeux, gij swnghcanjdui fanzdwg lai gai haeux hawj guekgya haenx, seyenz bouxboux cungj ndaej louz haeuxgwn 600 gaen. Liengzdungz ok haeux lai, gai hawj guekgya caemh lai. Bi 1965 demlai haeux 180 lai fanh gaen, vunz ok haeux 1200 gaen, cawz liux mauhsoq guh baenz hongdaengq guekgya le, moix vunz ce haeuxgwn baez daih’it dabdaengz 600 gaen, gyoengq ginzcung angqyangz dangqmaz.

Baihlaeng mbanj Mbanjliengz- dungz, daj Lanzmungz daengz Ndoinding、Daemzcouh rangh dieg neix, bya ndoqndangndang, haujlai dieg vihliux rom namh rom bwnh lij canj namhbeiz, namhraemx laesaet haenq lai. Veiz Gozcingh doiq duicangj gunghcozdui naeuz: “Lauxho, raeuz aeu ra hoengq, fatdoengh vunzmbanj ndaem faex cauh ndoeng, siumied byandoq.” Ho Yiyenz han: “Gou doengzeiq. Gunghcozdui mboujdanh aeu gaem ndei swnghcanj, lij hawj bang lwglan Liengzdungz guh di saeh ndei ndeu.” Gwncieng gvaq le, caengz nyaengq cingeng gonq, ginggvaq gunghcozdui caeuq gij ganbu Gunghse Liengzdungz cingsim gyoebcomz, daengx se 20 aen swnghcanjdui, cienzbouh okhong, ciuq dieggeng faen benq bauguh, haenq guh song aen singhgiz le, faexlwg gocoengz cix ndaem doh 450 lai moux ndoifwz. Gij faexlwg Veiz Gozcingh daiqdaeuz ndaem haenx, seizneix gaenq baenz ndoeng gvaq, mwncupcup.

(caengz sat)