Buzsam miz song boux lwg, bouxmbwk ndeu bouxsai ndeu.

Buzsam samcib bi bihaenx, daeggvan baenzbingh biek gyoengqde bae lo. Seizhaenx dahlwg ngamq ndaej seiq bi, daeglwg ndaej song bi. Buzsam bouxdog nyaengq ndaw nyaengq rog, laep ok laep dauq, ciengx doiqlwg majhung, gij haemzhoj haenx mbouj yungh gangj. Lij ndei, doiqlwg majhung le roxsoq youh hauqswnh, neix hawj Buzsam ndawsim raeujrubrub.

Dahlwg haq youq gyawjmbanj, sam ngoenz haj ngoenz couh ndaej maranz yawj meh, moix baez maranz yawj meh cungjdwg fwngz ndeu riuj noh, fwngz ndeu riuj bingjdiengz, doiq daxmeh cam nit cam raeuj, lij ndaej bang vunzranz guh haemq lai hong reihnaz dem, neix hawj gyoengqbouxgeq ndawmbanj lwgmbwk haq bae gyae mbouj ndaej gingciengz maranz yawj bohmeh haenx hozhaenz dangqmaz, gyoengqde baez raen dahlwg Buzsam byaij haeuj mbanj daeuj couh naeuz“Buzsam caen mizfuk”. Dingq daengz coenz vah neix, Buzsam ndawsim angqfaeng- faeng.

Daeglwg ngeihcib bi, youq ranz guh sam moux reihnaz, gwn ndaej imq, mbouj mizmaz cienz, aen ranznamh ciuhgeq ce roengzdaeuj haenx caengz ndaej gaijbienq, de naeuz: “Meh, gou yaek bae Gvangjdungh dajhong, aeu cienz maranz hwnj ranzlaeuz, mwngz bouxdog youq ranz guh reihnaz daiq hoj lo, bau hawj vunzmbanj guh ba! Gou geiq cienz dauq hawj mwngz yungh.”

Daxmeh naeuz:“Mbouj youq- gaenj, di reihnaz neix gou lij guh ndaej, boux guh reihnaz mbouj guh reihnaz ndang mbouj cwxcaih, caiq gangj lij miz dahcej mwngz bangfwngz, mwngz cuengqsim bae ba.”

Daeglwg gangj daengz guh daengz, de bae dajhong sam bi, ndaej cienz dauqma hwnj ndaej aen ranzlaeuz ndeu lo, yienznaeuz caengz miz cienz cang ranz, hoeng, Buzsam hix muenxeiq raixcaix.

Daeglwg naeuz: “Meh, gou caiq bae dajhong song sam bi dem, aeu ndaej cienz ma cang ranz ndei le, gou couh youq ranz buenx mwngz gvaq saedceij, ndeindei hauqgingq mwngz.”

Daxmeh dingq le aengyaeuj ngaek deihdindin, fouq lwgda lij hamz miz raemxda dem……

Daeglwg caiq bae mbouj geij nanz couh dwk dienhvah dauq naeuz miz youx lo. Buzsam baez dingq, angq dwk saetdiuq lumj lwgnyez nei, lij cien daengq fanh daengq daeglwg ndwencieng aeu daiq bouxyoux maranz gvaqcieng. Buzsam baez cuengq dienhvah couh gipmuengz bae coemh yieng: Baeuq, raeuz miz bawx lo……miz bawx lo……Buzsam simdaeuz ndaet dwk gangj mbouj ok vah.

Bihaenx ndwencieng dwg Buzsam hajcib bi gvaqdaeuj ceiq angq haenx. Bouxbawx dwg bouxvunz roxleix youh gaenxguh ndeu, hongranz hongdoengh de cungj guh dwk dinfwngz riengjret. Buzsam doiq bouxbawx neix muengxeiq dangqmaz.

Gvaq cieng le, Buzsam heuh songde bae lingx gezvunhcwng, mboujnex mbouj hawj songde bae dajhong. Song bouxcoz naeuz, mbouj gip, rom cienz cang ranz ndei gonq caiq gietvaen. Gangj baenzlawz Buzsam cungj mbouj doengzeiq. Songde cijndei sien lingx gezvunhcwng, caj cang ranz ndei le caiq cingjlaeuj. Mbatneix Buzsam onjsim lo.

Saehndei laebdaeb daeuj. Mbouj geijlai nanz, daeglwg dwk dienhvah ma naeuz mehyah mizndang lo, hoeng songde mbouj siengj aeu lwgnyez baenzvaiq. Buzsam dingq le gip dwk lumj duzmoed gwnz rekndat nei, naeuz: “Danghnaeuz sou dawz lwg ok, gou mbouj nyinh sou guhlwg guhbawx, gou muengh bouxlan neix muengh baenz hajcib geij bi lo, gou yungzheih ma? Ngu……ngu……Buzsam nyaenx mbouj ndaej daej lo. Song bouxcoz mbouj siengj hawj daxmeh siengsim, couh doengzeiq lo. Buzsam angq dwk bungz vunz couh naeuz de miz lan lo……

Mizndang cib ndwen, bouxbawx maranz senglwg lo, Buzsam gaj gaeq saemz noh, guenjgoq dahbawx, rubruh daeglan, nyaengq ndaw nyaengq rog, nyaengq dwk baegfefe, hoeng, aennaj de ciengzseiz riunyumnyum.

(caengz sat)