Daengqdiuz guh daiz, daengq- daemq daeuj naengh, 40 lai fouq lwgda cimyawj gaiq hwzbanj iq, gyoengq mehmbwk Dungcuz fwngz raeuzrit dwk“cau”saw gwnz hwzbanj, bak riengz lauxsae haenqrengz doeg Sawdungvwnz、ciengq Fwendungcuz, mboujguenj seizcou banhaemh oem, mbouj lau nengznyungz nyauz……8 nyied 29 hauh banhaemh, bouxsij hai ci bae daengz Sanhgyangh Dungcuz Swciyen Linzhih Yangh Bingzyenz Cunh Mbanjyenzcai Dungcuz yawj giz guh Sawdungvwnz Fwendungcuz beizyinbanh, gyoengq mehmbwk Dungcuz de cingq youz ndaw yienh boux lauxhangz Sawdungvwnz ceiq coz de——caemh yangh Gvandung Cunh bouxcoz Dungcuz heuhguh Siz Yungjyinh son’gyauq, gig haeujsim dwk hag Sawdungvwnz, neix hawj gou gamjdoengh raixcaix.

“Gaxgonq ndaejnyi vunz naeuz‘Dungcuz mbouj miz saw’gou couh simnyap, doenghgij Fwendungcuz Heiqdungcuz youz bouxgeq ndaw mbanj bien baenz de gou cungj yawj mbouj rox, seizneix hai ban son Sawdungvwnz, gou hag ndaej liux guh gienh saeh daih’it couhdwg gag guh baiz diemqhek nem danbyaek aeu Sawgun Sawdung- vwnz sij!” Bouxhag Vuz Aisenh riu naeuz.

“Dangqnaj daengx yienh gungh miz lauxsae coz son Sawdungvwnz gyawj 100 vunz, doenghboux rox aeu Sawdungvwnz sij saw haemq ak de miz 40 lai vunz, doenghboux rox doeg sij Sawdungvwnz de gaenq mauhgvaq 5000 vunz, dou dajsuenq aeu Hozlij Siujyoz guh giz sawqdiemj, doi Sawdungvwnz haeuj hagdangz, danhseih aenvih cwngcwz bangfuz noix、cienzngaenz mbouj bauj miz、lauxsae Sawdungvwnz hojgvaq daengj cingzgvang, hawj dou naemj guh rengz mbouj gaeuq, caiq mbouj yawjnaek nem bangfuz couh hoj guh roengzbae lo!”Boux Minzyijgiz gizcangj aen yienh neix Vuz Meijlenz lwnh naeuz.

Daj bi’gvaq daeuj, aen yienh neix gungh banh Sawdungvwnz Fwendungcuz beizyinbanh 12 geiz, bouxhag mauhgvaq 1000 vunz. Doengzseiz, aen yienh neix doeng- gvaq moix bi bien geiz《Sawdungvwnz》ndeu、moix cou bo geiz《Sinhvwnz Vahdungcuz》ndeu、moix cou roengz lajmbanj cuengq denyingj gojgaeq nem gohgi Vahdungcuz gak ciengz ndeu、boiqhab Gvangjsih Gujcizban cingjleix okbanj buek saw vwnzva Dungzcuz daengj fuengsik haenq- rengz swnjcienz nem henhoh gij vwnzva dijbauj Dungcuz.

(Gungh Bujgangh/龚普康)