特色竞技隆重壮观的内蒙古那达慕大会

□ Dauyiznaz Gujlwngz ingj Sinhyungz hoiz

Moix bi liggaeuq ndwenloeg coseiq (dingzlai dwg youq ligmoq caet bet nyied seiz nywj heu va nding、yiengz biz max cangq neix), beixnuengx Mungzgujcuz cungj angqyangz gvaq ngoenzciet hoihhung “nazdazmu”, ndaw gvaengzlaengx bak lai song bak leix de, gyoengq muzminz cungj fan aeu ndangdaenj Mungzgujcuz moq okdaeuj, cang- ndang moqsup gyaeuget, daengx ranz lauxlaux nyaeqnyaeq, daiq aen Mungzgujbauh caeuq doxgaiq gwn nem ngoenzyungh, dap cimax gwih max dwk, daj seiq fueng bet baih comz daengz gizdieg banh ciet de gvaq ngoenzciet, camgya guh roxnaeuz yawjngonz gak cungj gak yiengh vwnz dij hozdung; gij canghdajgai canghbuenq gyawjgyae haenx caemh doz doxgaiq daeuj baijdan dajgai guh seng’eiq, mbangj gai doxgaiq ngoenzyungh, mbangj soucawx bwnyiengz daengj doxgaiq dangdieg, yienhciengz nauhyied hoenghhwd.

“Nazdazmu” lizsij gyaenanz, ciuq sawgaek gwnz dat 《Sawdat Cwngzgizswhhan》 geiq naeuz, “nazdazmu” youq guek Mungzguj laebbaenz cogeiz, Cwngzgizswhhan ndaej doigawj dang goengvuengz Mungzguj, de vih cazyawj aen bingdoih bonjfaenh, henhoh caeuq faenboiq diegnywj, moix bi liggaeuq ndwenloeg cungj banh mbat doxcomz hung ndeu, heuh goengdaeuz gak aen gyokgyog comz daengz giz ndeu, vih yienh’ok yiengh doxgiet doxndei caeuq angq hoh fungsou, caemh doengzseiz banh “nazdazmu”. Hainduj moix bi caenh banh nyingz naq、gwih max doxdax roxnaeuz doxbeg ndawde hangh ndeu; daengz Ciuhyenz、Ciuhmingz le, nyingz naq、gwih max doxdax、doxbeg sam hangh neix hab hwnjdaeuj banh, baenz le cungj hingzsik dingh banh ndeu; daengz Ciuhcingh, “nazdazmu” ciemhciemh bienqbaenz cungj hoz- dung guh’angq miz muzdiz、 miz cujciz youz guenfueng dinghgeiz comz banh ndeu, aeu suhmuz (dangq yangh)、giz (dangq yienh)、mungz (dangq digih si) guh danhvei, buenq bi、bi ndeu roxnaeuz sam bi banh mbat ndeu, itbuen lienzdaemh banh sam daengz haj ngoenz, itcig cienz daengz seizneix. “Nazdazmu” geizgan, sien aeu banh aen hozdung caeqcuengq hoenghhwd ndeu, youz lazmah siuyieng diemj daeng, ngon ging danq baed, mbaenjgouz saenzlingz baujyouh, siu cai siu nanh; riengzlaeng guh doxbeg、gwih max doxdax、nyingz naq、gyongx max、dwk geiz Mungzguj doenghgij hanghmoeg conzdungj minzcuz neix, mbangj dieg lij banh miz denzging、bengcag、dwk baizgiuz lanzgiuz doenghgij dijyuz hanghmoeg neix, doengh bi neix daeuj, hoihhung lij demgya le dwkgienz、dwkgiuzmax、gwnz max buet nyingz naq、gwnz max buet bagraemj、gwih max beij byaij vaiq、hai cimozdoz doenghgij biujyienj cezmuz neix, hawj hoihhung engq nauhyied engq ndeiyawj engq yinx vunz. Daengz doengxhaemh le, gwnz ranghnywj lij haprwenz gij sing gimzgyaeujmax sing go sepset rwenzred haenx hwnjdaeuj, gyoengq mbauqsau hopngomx feizdong itmienh diuq foux itmienh ciengq go, gangjgangj riuriu, angq nauh mbouj dingz.

Cawz Neimungz le, gyoengq beixnuengx Mungzgujcuz Ganhsuz、Cinghhaij、Sinhgyangh hix caemh angqangq yangzyangz dwk comz gvaq aen ciet hoengh neix.