Bi 1965 ndwen 1, Liengzdungz ndaej doeng dienh, ranzranz cungj nda ndaej daeng, caemhcaiq youq Lajdoengh、Daliengz、Vujlij、Daemzcouh gij dieg neix banh le cangjnienjhaeux、cangjgyagoeng faenjsoiq、aenmuzieng dienhdoengh, fuengbienh le vunzlai, bouxboux vuenheij dangqmaz.

Ngoenz ndeu, Veiz Gozcingh daj Lajdoengh bae Vujlij, yawjraen diuzroen bae hag haenx miz diuz mieng ndeu, gwnz mieng gvaq miz song diuz faex, siujhagseng ngoenz- ngoenz daj gwnz giuzfaex neix baebae dauqdauq, de you hagseng mbouj ancienz, cix daegbied daengq gij dungzci guh cungjdij gveihva Liengzdungz haenx aeu coih ndei diuz mieng neix, guh aen giuz iq ndeu, fuengbienh vanzlai byaij, baujcingq hagseng ancienz.

Lajdoengh Cunh miz song aen mbanj, vunzlai aeu bae dieggyae rap raemx, raemx youh yaez, Veiz Gozcingh cix caeuq gyoengboux gunghcozdui doxyaeng, youq henz- gyawj guh song aen cingj daemzlawhraemx hawj vunzlai. Daj seizneix hwnj, song aen mbanj rap raemx cix ngaih lai lo, gwn raemx caemh seuqcingh lai lo.

Bi 1965 ndwen 1 miz haet ndeu, gyangbaq mwi hauseksek, mbwn nitsisi. Aen swnghcanjdui Veiz Gozcingh youq haenx boux duicangj Vangz Gvanghdai, ranz baez rongh couh bae daengz gak ranz hemq: “Ngoenzneix yaek guh suenmak, bouxsai vat gumz, mehmbwk rap boengzdaemz.” Veiz Gozcingh rox ndaw doih haujlai vunz cungj mbouj miz buhmienz, doq baij vunz bae caeuq duicangj doxyaeng, dwg mbouj dwg caj daengngoenz okdaeuj le caiq bae guh hong? Duicangj dingq gij yigen de, youh baez ranz baez ranz bae naeuz caj daengngoenz ok le cij bae guh hong. Vunzlai cungj naeuz Lauxveiz ndaw sim cuengq gyoengq vunzguhnaz, caeuq beksingq sim lienz sim.

Liengzdungz nazreih lai, vunz guhhong noix, bouxvunz bingzyaenz ndaej song moux naz. Veiz Gozcingh caeuq vunzmbanj “sam caemh” le, rox daengz hong nazreih Liengzdungz gig gaenj gig naek, youq seiz hong nyaengq, ranz ngamq rongh, vunzmbanj couh riuj rek souh bae naz, mbwn laep cij dauq ranz.

(caengz sat)