Miz boux lwgnyez ndeu cam daxbuz de: “Vih gijmaz mbwn baenz- neix sang? Vih gijmaz deih baenzneix hung? Mbwn caeuq deih dwg saeh baenzlawz nei?”

Daxbuz hawj lwgnyez gangj le aen goj ndeu, daxbuz naeuz, aen goj neix dwg de seiz iq dwg daxbuz de gangj hawj de dingq.

Daxbuz gangjnaeuz: Dingq gangj youq seiz ciuhgeq, mbwn caeuq deih cungj lienz youq itheij, luenzlulu lumj aen gyaeqgaeq hung ndeu, ndaw gyaeqgaeq miz boux vunz ndeu, couh dwg Banzguj. Banzguj dwg boux vunz hungmbwk gig miz rengz ndeu, de maj ndaej daegbied vaiq, ngoenz maj sang ciengh ndeu, caj daengz ndaw gyaeqgaeq cang Banzguj mbouj ndaej seiz, gyaeqgaeq hung couh dek baenz song mbiengj lo, mbiengj baihgwnz miz giz doxlienz di, deng Banzguj dawz fagfouj caeuq fagsiuq youh bag youh siuq bag hai lo. Yienghneix Banzguj couh maj ndaej engq vaiq lo, de gyaeuj dingj mbwn, ga daemh deih, ngoenz maj ciengh sang, mbwn hix sang ciengh ndeu, deih hix na ciengh ndeu. Itcig gvaq baenz it fanh bet cien bi, mbwn sangvikvik, yuengq mbouj ndaej, deih nanwtnwt, doeng mbouj daengz daej lo. Banzguj nyinhnaeuz gij hong swhgeij caux mbwndeih guh ndaej ca mbouj lai lo, yienghneix de couh dawz aen ndang swhgeij guh aen bienqvaq hunghang ndeu: De boq ok heiq bienqbaenz rumz caeuq fwj, hemq ok singyaem bienqbaenz sing bya yiengjhumhum, lwgda baihswix bienqbaenz daengngoenz, lwgda baihgvaz bienqbaenz ronghndwen, aen ndang caeuq seiq ga bienqbaenz goengqbya sangngaungau, lwed bienqbaenz raemx ndaw dah, naeng bienqbaenz namh, bwn bienqbaenz faex caeuq rum, hanh bienqbaenz fwn……Gwnzbiengz raeuz couh bienqbaenz yienghceij seizneix lo.

Ndigah vahsug cungj gangj “daj Banzguj caux mbwndeih daeuj……”, dwg gangj mbouj miz gij saeh beij de engq caeux lo.