(ciep geiz gonq)

Miz haemh ndeu, Dingh cujyin daeuj ndaw fuengz daxboh, de dawz foengq yaekseiz ndeu okdaeuj hawj daxboh, naeuz:“Neix dwg yaekseiz bangunghsiz douhung, dou cangh- gu……Hawj mwngz dawz, gou cuengqsim. Ndeindei guh duenh seizgan ndeu gonq, gvaqlaeng menh gangj……” Daxboh doeksaetyat, gipmuengz naeuz:“Cujyinj, neix mbouj ndaej mbouj ndaej, gou dwg hozdungzgungh, mwngz heuh doengh boux cingqsikgoeng haenx dawz lai ngamj, caiq gangj gou dwg daeuh gwnz daiz, saek ngoenz deng doiq baema, gou dawz yaekseiz, danghnaeuz sied huq le,vunz naeuz gou guhcaeg bw. Cujyin, gou mbouj dawz, caen dahraix.” Cujyin riu naeuz: “Gou hawj mwngz dawz mwngz couh dawz, gaej ndaej lox doekdamj, mwngz sien dawz duenh seizgan ndeu……” Dingq cujyin nyaenx gangj, daxboh cijndei dawz yaekseiz lo.

Gvaq ndaej geij bi le, daxboh ndaej cienjcingq baenz cingqsikgoeng lo. Dingh cujyin diuh lingh aen danvih bae ngoenzhaenx, de dawz vahsaed gangj hawj daxboh nyi:“……mbat daih’it heuh mwngz bae gai 90 gaen noh, gou naeuz 100 gaen, dwg gaujniemh mwngz onj mbouj onj sim guhhong, 10 gaen noh couh 8 maenz, mwngz ndwen cienzhong ndeu 30 maenz; mbat daihngeih hawj mwngz 110 gaen noh, gou naeuz 100 gaen, lai gai ndaej 8 maenz, mwngz mbouj dam’aeu; mwngz sauqranz gip ndaej gimzmyaex、 ngaenzdih, 5 gak ngaenz laj fwnz henz fouj, nohmou ndaw daej batlwed, cungj dwg gou cuengq daeuj gaujniemh mwngz. Mwngz gig lauxsaed, baezbaez gvaq ndaej gvan, yaekseiz couh hawj mwngz dawz daengz seizneix lo. Cizbinjcan raeuz guh ndaej ndei, couh dwg miz mwngz cungj vunz lauxsaed gaenxhong neix danggya bw. Mwngz yawj, boux beij mwngz daeuj gonq hix miz, daeuj laeng hix miz, vihmaz deng doiq baema? Mwngz ndaej cienjcingq couhdwg baengh guhvunz lauxsaed bw.” Daxboh dingq le, youh gikdoengh youh angq, caeuq Dingh cujyin itheij ndoet laeuj daengz fiz bae.

Caiq doeklaeng, gou bae dang lauxsae ngoenz gonq, daeglwg gou bae guh gunghvuyenz ngoenz gonq, daxboh sien dawz gij saeh lauxsaed de gangj hawj dou dingq, daengq dou geiq maenh coq sim, aeu daihdaih cienzswnj roengzbae. Daxboh gyaeu ndaej 96 bi, de yaek gvaqseiq ngoenzde, lij mbouj lumz daengq dou guhvunz aeu lauxsaed, guh boux vunzcingq ndeu.

Dou geiq maenh vah daxboh, hix ei vah daxboh bae guhvunz guhsaeh.

(sat)