Moix bi ngoenzhaw gatsat cieng cibngux yaek daengz seiz, beixnuengx Bwzguyauz Nanzdanh Yen cungj angqvauvau gvaq ngoenzciet nienzgai. Ngoenz neix, gyoengq vunzlai Lijhuz、 Bazhih song aen Yauzcuz yangh neix cungj cangndang moqsup gyaeuget, foedfoed nanghnangh comz daengz gwnzhaw ndaw yangh camgya hozdung yawj nauhyied, guh gaicawx, vunz cien vunz fanh, nauhyied dangqmaz. Gij hozdung fungsug minzcuz gig miz daegsaek haenx caemh yinx haujlai hekyouz bae ngonzyawj, caenh raen gwnzhaw vunz caenx ndaetfwdfwd, nauhyied hoenghhwd, leihndei doxhuz.

Bwzguyauz dwg Yaucuz ndawde nga ndeu, gyoengqde gag heuh bonjfaenh guh “Giznuj”, aenvih gij vunzsai de cungj daenj diuz vaqhau gij raez ngamq goemq gvaq gyaeujhoq ndeu cix ndaej heuhguh “Bwzguyauz”, gyoengqde cujyau dwg comzyouq Lijhuz、Bazhih song aen Yauzcuz yangh ndaw yienh Nanzdanh, gyaeujvunz daih’iek miz 3 fanh vunz, aenvih gyoengqde ciengzgeiz gvaq gij saedceij gyokgyog ciuhnduj, seizneix lij louz miz gij fungsug sibgvenq daegbied gag miz de、gij yisuz vwnzva ndawbiengz minzcuz dijbauj de caeuq gij ndangdaenj minzcuz daegbied de, ndaej heuhguh “sigvaq lixlw fungsug minzcuz”. Ciuq gij fungsug sibgvenq dangdieg gaenq riuzcienz nanz raeuh de, moix bi ngoenzhaw gatsat yaek daengz cieng cibngux, beixnuengx Bwzguyauz cungj angqyangz doxcomz gvaq nienzgai. 2013 nienz, Nanzdanh Yen dawz cungj fungsug sibgvenq nienzgai neix dingh guh “ciet vwnzva nienzgai Bwzguyauz Cungguek”. Ngoenz neix, gij beixnuengx Yauzcuz Lijhuz、Bazhih song aen Yauzcuz Yangh nem gij beixnuengx Yauzcuz Gveicouh dep song aen yangh neix haenx, cungj daenj gij ndangdaenj bonj minzcuz youh moq youh lwenq de comz daengz gwnzhaw ndaw yangh, angqyangz guh gak cungj gak yiengh hozdung, dwkgyangq doxdax，doiq fwenyoux, diuq foux nyenz boq digngox, boq gaeuvaiz yienj heiq minzcuz daengj. Youq diegdangz gyaeujhaw, laj diemq gwnzhaw, gyoengq vunzsai camgya roeg doxdoj gaeq doxdoj dwkgyangq doxdax, boq gaeuvaiz roq nyenz diuq foux eu Fwenyauz, nyingz naq nyingz cungq beij nyingzcinj; gyoengq mehmbwk cix dozmae heuxmae baij luengqmae, at baengz dajsiuq nem vehgau, baijyienj ndangdaenj Yauzcuz, doxlwnh doxbeij dinfwngz. Mwngz yawj, dwkgyangq nyingzcungq daengj doxdax gaenjcieng haenq- hwd, mizyinx raixcaix, gyoengq bouxyawj yawj dwk maezmwd deihdeih bekfwngz haenh ndei; caiq yawj gyoengq mehmbwk baijyienj ndangdaenj Yauzcuz, yienj heiq fungsug fungcingz Yauzcuz, fungcingz daegbieg、dauq yienh yienghgeq, ndeiyawj mizyinx, bouxhek caemh bekfwngz mbouj dingz. Baez daengz doengxhaemh, hoihhaemh dongfeiz youh riengzdwk nauh hoengh hwnjdaeuj, gyoengq vunzmbanj caeuq hekyouz fwngz gaem fwngz, hopngomx dongfeiz ciengq ha diuq ha, sing riu sing angq haprwenz byonghmbwn, baenz hwnz mbouj sanq.