Lajbiengz gug- gug gehgeh cungj miz singyaem. Sing- yaem gak cungj gak yiengh, youq gwnz- mbwn, roeg iq ciengqgo cici ciuciu hawj vunz simmaez; youq gwnzmboek, gyoengq lwgnyez hihi haha guhcaemz hawj vunz lumzgeiq nyapnyuk; youq daejhaij, bya iq byoq gij raemx yiengj bupbup, hawj vunz gamjdaengz saenzgeiz.

Hoeng miz cungj singyaem he hawj gou gig mbwq, haenx couh dwg gij sing daxmeh daengx ngoenz damzbyoedbyoed.

Moix ngoenz mbwn ngamq rongh, daxmeh couh youq henz rwz gou damzbyoedbyoed, “vaiq hwnq lo, vaiq hwnq lo, lij yietnonx ngaungau guh gijmaz?” “Guh saeh din fwngz riengj di!” Daxmeh rag gou roengz congz daeuj, lienz gou swiq naj hix ndwn youq henz. Bingzseiz daxmeh youq ranz, gou hwnq congz daengz ok dou cij aeu haj faen cung. Ok dou le, daxmeh lij gyaep okdaeuj cam:“Dawz saw caez caengz? Gangbit sup maeg rim caengz?”Caen dwg mbwq dai gou lo, mingh gou baenzlawz baenz hoj ha! Cuengqhag dauqma, daxmeh couh coi gou guh cozyez, cozyez guh sat le, daxmeh lij cungj naeuz:“Genjcaz ndei di, miz mbouj miz giz guh loek?”Gou gik genjcaz, cungj deng daxmeh genjcaz ok geij giz loek. Nanz le, gou hix miz sibgvenq gag genjcaz cozyez lo. Baez he gaujsi, gou sij sat sigenj le, cij lw geij faen cung couh roengzdangz lo, gou gaenq mbouj miz sim genjcaz lo, hoeng gij sing raemh daxmeh youh yiengj youq henz rwz, ndigah gou youh nyinhcaen genjcaz hwnjdaeuj, baezhaenx gaujsi, gou gauj ndaej cingzcik ndei. Daj baezhaenx hwnj, gou gamjdaengz sing raemh daxmeh hix haemq miz yungh lo.

(Dangz Swh)