Daxboh gou 30 lai bi seizhaenx, aenvih miz bonjsaeh gaj mou gaj vaiz, ndigah, ndaw Gunghse Cizbinjcan couh aeu de bae guh hozdungzgungh.

Doxboh haeuj Cizbinjcan ngoenz daihngeih, boux lingjdauj de Dingh cujyin couh anbaiz de bae guh hong baet ranz, Dingh cujyin doiq daxboh naeuz: “Mwngz dawz aen ranz neix gip seuq baet seuq bae, raeuz aeu daeuj guh bangunghsiz……” Ndaw aen ranz haenx miz haujlai doxgaiq, daxboh gwed bah okdaeuj sat cij conx raemx sauq nyap, guh baenz buenq ngoenz lai cij baet seuq. Seiz ngamq souhong, Dingh cujyin couh daeujdaengz, de doiq daxboh naeuz:“Hoz Sauzdungj, mwngz guhhong caen ak ha, baenzvaiq couh baet seuq aen ranz luenhcabcab neix. Yaekseiz gou mbouj rox doek gizlawz bae, haet neix gou daeuj ndaw neix byaij gvaq, mwngz raen doek youq neix lwi?” Daxboh han naeuz: “Yaekseiz dauq mbouj raen, youq gakciengz dauq raen miz fag gimzmyaex ndeu, laj bah miz 3 maenz ngaenzdih, neix gyau hawj mwngz.” “Gip ndaej mwngz couh aeu ba, gimzmyaex youh mbouj dijcienz……” “Mbouj aeu, mbouj aeu, neix gyau hawj mwngz ba.” Daxboh gangj sat couh gyau gij huq gip ndaej haenx hawj Dingh cujyin lo.

Miz ngoenz ndeu, ndaw danhveih gaj mou, daihgya gwn haeux le, Dingh cujyin doiq daxboh naeuz: “Ngoenzneix lauj Cangh cingjgyaj, mwngz bae lawh de gai 100 gaen nohmou……” Daxboh mbouj gangj saek coenz vah, couh bae gai nohmou.

Lajbyonghngoenz, daxboh soudan dauqma, couh dawz cienz bae gyau hawj Dingh cujyin, daxboh naeuz: “Gai ndaej 90 gaen, cienz youq neix.” “Ha?100 gaen bae cij gai ndaej 90 gaen, yienghneix guh mwngz bogbonj lai bw. Ra bae 8 ngoenz cienzhong lo. Mwngz dwg mbouj dwg mbatmbat lai caengh noh hawj vunz?” Dingh cujyin doeksaet dwk cam Daxboh. Daxboh naeuz:“Siedbonj hix mbouj miz banhfap, gou mbouj caengh lai hix mbouj caengh siuj hawj vunz, gai ndaej geijlai gou couh gangj geijlai.” “Hai, mbatlaeng siujsim di, dawz cienz bae gyau hawj cuznaz ba……Geij ngoenz neix mbouj aeu mwngz bae gai nohmou lo.” Caen dahraix, gvaqlaeng, Dingh cujyin baij daxboh bae cab gaeumaenz dwk vaiz, bag fwnz cawj mok gueng mou, sauq riengh rap bwnh……Hongnaek hongmbaeu cungj heuh daxboh bae guh. Daxboh laemxsim laemxhoz guh,mbouj lau uq, mbouj lau naiq, yienghyiengh hong guh ndaej sawj cujyin muenxeiq. Miz baez ndeu, daxboh bag fwnz, laj fwnz henz fouj miz 5 gak ngaenz, daxboh gip hwnjdaeuj gyau hawj cujyin. Daxboh gag boux ndeu loengh byaek dajcawj, laj daej bat hung cang lwedmou haenx miz gaiq nohcing song gaen ndeu, daxboh cungj dawz bae gyau hawj sizdangz danhvei.

Gvaq ndaej cib lai ngoenz, miz haet ndeu, Dingh cujyin doiq daxboh naeuz: “Mwngz doi 100 gaen nohmou bae gwnzhaw gai, siujsim di, gaej hawj miz loekca lobw.”

Daxboh gai noh sat dauqma, Dingh cujyin cam de:“Baenzlawz yiengh? Mbatneix mbouj siedbonj loba?” “Mboujdanh ndi siedbonj, lij miz canh dem, gungh gai ndaej 110 gaen……” “Hoz daxau, mwngz baenzlawz guh? Mwngz itdingh ngaek gyaeujcaengh gemx boux dajcawx. Mwngz raen mbat gonq ra bae 10 gaen, neix couh ngaek gyaeujcaengh bouj dauq?” Daxboh sing unq naeuz: “Cujyin, gou mbouj gamj ngaek vunz, gai ndaej deijlai gou couh gangj geijlai.” Cujyin naeuz: “Ndaej la, baezlaj buenzdiemj mwngz caez daeuj yawj caengh.”(caengz sat)