Moix bi liggaeuq ndwensam ngeihngux, Dava Yauzcuz Swciyen Gyanghhih Yangh Aihih Cunh cungj banh ciengz cietfwen nauhyied ndeu, gyoengq vunzmbanj henzgyawj nem hekyouz daj dieggyae seiq fueng bet baih caenx daeuj ganj cietfwen, baenz bang baenz gyoengq, caemhcaiq doq byaij doq eu gij fwen gag bien haenx, humx comz daengz ciengzfwen Aihih angq gvaq ngoenzciet, vunzsoq dabdaengz song fanh lai vunz, hawj ndaw mbanj Aihih ndaetfwd hoenghhwd.

Mbanjaihih youq giz gapgyaiq yienh Dava caeuq yienh Bahmaj, gizneix lij hwng riuz gij fungsug minzcuz daegbied youh gaeuqgeq haenx. Ciuhgeq, liggaeuq ndwensam seizcin doekndaem hainduj gaxgonq, rangh dieg neix cungj aeu banh aen yizsi caeqcuengq saenzbuz, mbaenjgouz saenzcoj doek fwn、baujyouh haeuxgwn fungsou, caemhcaiq youq yizsi caeqcuengq sat le eu fwen doiq fwen, doeklaeng cungj fungsug neix bienqbaenz le ngoenzciet, couhdwg cietfwen. Moix bi ngoenz neix, gyoengq vunzlai saujsu minzcuz gij yienh yangh seiqhenz cungj comz daengz ciengzfwen Aihih, caenhcingz dwk doiq fwen lwnh cingz, dingq fwen gangjgoj, gyoengq mbauqsau caemh baenz bang baenz gyoengq dwk daengz gwnz cietfwen doiq fwen ra youx, mwngz gyaez gou ndiep, cingzeiq laeglili, hamz gij cingsaenz minzcuz caeuq vwnzva minzcuz naekgywg nanwt.

Dwen daengz cietfwen Aihih, dangdieg lij riuz aen goj gyaeundei caemhcaiq siliengz ndeu. Riuz naeuz haj bak bi gaxgonq, Fanhgangj (yienh Bahmaj seizneix) miz dah sau Bouxcuengh gyaeundei simsoh youh dwg lwggyax haemzhoj ndeu, aenvih ndaw ranz gungz lai, mbouj ndaej doegsaw, ngamq cibseiq bi couh deng bik haq hawj bouxgvan ranzfouq beix de baenz cibhaj bi ndeu guh yah. Aenvih nienzgeij doxca lai, de mbouj nyienh caeuq bouxgvan caemhmbonq, baenz ngoenz daejsebseb mbouj dingz. Miz bi ndeu ndwensam ngoenz ngeihsam, de daj Mbanjminzan caeg deuz okdaeuj doq buet doq eu fwencieg, dai cungj mbouj ma ranzgvan, itcig eu fwen daengz “Gamjai” (Gamjaihih seizneix), lienzdaemh eu fwen sam ngoenz song hwnz cungj dwg fwendaejhaq, sing fwen siliengz simcieg. Gyoengq vunzmbanj henzgyawj dingqnyi le foenxfoenx humx gvaqdaeuj, dinghdingh dingq gij fwen de, caemh doenghcingz siliengz siengsim dwk raemxda doekbyoegbyoeg. Daengz haemh ngeihngux le, gyoengqvunz caiq hix mbouj dingqnyi gij sing fwen de lo, doeklaeng gyoengqvunz dingqnyi naeuz dahgyax gaenq youq ndaw “Gamjai” venjhoz dai bae, hoeng cix ra mbouj raen seihaiz, gyoengq vunzmbanj couh souj youq henz “Gamjai” daengz ranzrongh le cij mbouj sij ndaej dwk menhmenh sanq deuz. Miz vunz naeuz gij sing fwen dahgyax hawj diensaenz gamjdoengh lo, diensaenz gaenq sou de bae guh sienfwen. Baenzneix, moix bi daengz ngoenz neix, gyoengq vunzmbanj dangdieg cungj lumj doxiu gvaq nei comz daengz Mbanjaihih, doiq fwen cienz cingz, geiqniemh sienfwen, baiqfug mbauqsau gagnyienh doxaeu, mbaenjgouz ndaw bi fungsou.

Doengh bi neix daeuj, cietfwen Aihih ndaej daengz cwngfuj caeuq sevei gak gyaiq yawjnaek caeuq cihciz, hawj gij neiyungz cietfwen engq lai cungj lai yiengh, cawz doiq fwen danq cingzndiep le, gyoengqvunz caemh eu fwen haenhdanq gij cwngcwz hawj lwgminz souh’ik dangj raeuz, doiq fwen soncienz gohgi ndaem ciengx, ngoenzciet banh ndaej bi beij bi nauhyied, mingzdaeuz bi beij bi hung, baenz Gyanghhih Yangh aen binjbaiz vwnzva minzcuz gig miz daegsaek ndeu.