Ngoenzneix dwg gou guh cawjranz, banhaet gig romh couh hwnq lo, gienh saeh daih’it couh dwg cawx byaek, neix sawj gou gig gyaeujdot, aenvih mbangj boux gai byaek mbouj dwg ngaek dacaengh, couh dwg gai gij byaek rwix hawj vunz, lumjnaeuz gai gij bitgaj gaeqgaj haenx cungj haeujraemx.

Gou dawz di ngaenz he, bae daengz diengzhaw. Byaij daengz doeksat, cij daengx youq dangqnaj goenglaux he, sim siengj: Danghnaeuz caiq mbouj cawx byaek, couh fwngzbyouq baema ranz lo. “Baengzyoux iq, siengj cawx byaek ma?”Daxgoeng cam gou, gou naeuz:“Gij byaek mwngz baenzlawz gai ha?”“Sam maenz ngaenz gaen,”“gou cawx sam gaen.”Gou naeuz, mwh daxgoeng cang byaek hawj gou seiz, gou sijsaeq yawj de:Byoemgyaeuj de lij haemq ndaem, ngamq miz saek diuz saek diuz byoem hau, buh de miz di gaeuq lo. Yawj ndaej ok, ranz de haemq gungz di. Seizneix daxbuz he byaij gvaqdaeuj, daxbuz cam:“Gij ho neix gai geijlai ngaenz gaen?” Daxgoeng naeuz:“Gou gag ndaem, mbouj yungh maz bonjcienz, mwngz seizbienh aeu di he baema gwn ba.”…… Lajmbwn gingqyienz miz gij doxgaiq mbouj aeu ngaenz, daxgoeng neix caen ndei. Daxgoeng gaenq bang gou cang byaek roengz daeh ndei, daengq gou dawz ndei, gaej hawj doek lo. Gou hawj cienz hawj daxgoeng le angqvauvau ma ranz lo.

Yienznaeuz gij byaek haenx gou caeux couh gwn liux lo, hoeng gou lij mbouj rox lumz goenglaux haenx.

(haj nienzgaep Maj Vaz)