Moix bi liggaeuq ndwensam ndawnyieb, gih raeuz Nazboh Yen Bwzswngj Yangh mbanj Hungzyiz Bohvuj cungj banh ngoenz ciet gouz fwn hozdung hoenghhwd ndeu, vunzmbanj caeuq caencik baengzyoux nem hekyouz angq comz youq diegdangz ndaw mbanj, guh yizsi caeqbaiq gouz fwn, ciengq go diuq foux, nauhyied raixcaix.

Ciet gouz fwn dwg aen ciet conzdungj ndawbiengz vunz Hungzyiz cienbak bi cienz roengzdaeuj ndeu, dwg hangh hozdung cietgingq sinzswng ndeu. Riuz naeuz, caeux youq gunghyenz 897 nienz, gueklaux Nanzcau fatluenh hoenxciengq, beksingq Hungzyiz deuznanh roengz baihnamz, senj daengz ndaw gyaiq yienh Nazboh, ra gizdieg Mbanjbohvuj youq roengzdaeuj, daih dem daih gvaqbae, seizneix daengx mbanj miz 50 ranz 226 vunz, baenz ndaw yienh Nazboh aen mbanj dandog vunz Hungzyiz comzyouq ndeu. Vih niemhngeix cojcoeng, Mbanjbohvuj moix bi youq liggaeuq ndwensam ngoenz ngeihseiq daengz ngeihloeg, cungj ciuq diengan deihcei doisuenq ok roeb ngoenzsaenz couh banh ciet gouz fwn. Ngoenzciet, ndaw mbanj ranzranz naengj haeuxnaengj haj saek, loengh daiz byaek rimrad ndeu daih gij hek gak cuz daeuj ndaw mbanj camgya gouz fwn haenx. Gij doxgaiq dwkcuengq gouz fwn youz daengx mbanj comz banh, miz duz vaiz ndeu、duz mou ndeu、duz ma ndeu、duz gaeq ndeu, sien gaj ma gaj mou caeq goengdojdeih, caiq gaj vaiz caeqbaiq ciengzdauh, lwedvaiz cix faet hwnj nga faex doi youq gak giz bakroen aenmbanj, eiqsei dwg gyaep sez siu cai, caemh lwnh naeuz vunzhek byaij gvaq henz mbanj nyi: Ngoenzneix dwg ciet gouz fwn Hungzyiz, angq coux bouxhek、baengzyoux byaij gvaq dieg neix haenx daeuj ndaw mbanj guhhek, doengzcaez gouz fwn.

Yizsi gouz fwn guh sat le, bouxsai Hungzyiz couh roq aennyenz yiengjdungdung, saimbwk lauxnyaeq hopngomx geizfan cungqgyang ciengzdauh, humx baenz aen gvaengzluenz hung ndeu, riengz sing gyong diuq gij foux gouz fwn daj ciuhgeq cienz roengzdaeuj haenx. Gyoengq bouxhek、baengzyoux daeuj camgya gouz fwn haenx, caemh foenxfoenx camgya haeuj ndaw doih diuq foux bae, diuqyekyek angqfaengfaeng, ciengzmienh hoenghhwd nauhyied, cigdaengz daengngoenz doekbya cij dingz. Seizneix, gwnz ciengzdauh gouz fwn gaenq nda daiz baij byaek baenz baiz baenz coij, donq caeuz doxcomz angqyangz nauhyied ndeu couh riengzdwk hainduj lo. Gyoengq bouxsai Hungzyiz baenz vanj baenz vanj gwn laeuj、gingq laeuj, gyoengq dahsau caemh naj riunyumj vah unqnemq dwk gingq laeuj coi gwn laeuj, gwnz ciengzdauh vunz angq sing gyuk, sing riu mbouj dingz. Riengzdwk, gyoengq dahsau Hungzyiz caemhsing ciengq go coux hek、go gingq laeuj hwnjdaeuj, sing go sepset rwenzred ndeidingq dangqmaz, gyoengq daegmbauq caemh doq gaem vanj laeuj doq ciengq go fungsou diuq foux fungsou hwnjdaeuj, sing go goksad haprwenz, ndawde lij cab miz sing hatmax beij laeuj, angqangq riuriu, mbouj dingz mbouj duenh, cigdaengz mbwn buemxsuemx baihdoeng loh ok di hausek……