Moix bi cietheiq goekhawx gvaq le, Sanhgyangh Dungcuz Swciyen Linzhih Yangh Gauhyouj Cunh cungj senj ngoenz ngoenzndei gitleih ndeu hoengh banh ciet byaekgep, caeqcuengq cojcoeng, guh gak cungj gak yiengh vwnz dij hozdung, doigawj siugai nungz- canjbinj daegsaek dangdieg, hoenghhwd nauhyied, bibi cungj miz baenz fanh hekyouz ndaw guek rog guek comz bae gvaq ciet.

Ciuq vunz dangdieg gangj, raeblaeng gij byaekgep singjsien homfwt neix lij yo miz aen gojriuz gyaeundei ndeu. Riuz naeuz, Gauhyouj nyuenz dwg dieg fwzfwdfwd ndeu, ndaw lueg faex mwn laepcup, aenmboq deihdaenx, duznyaen baenz bang. Ciuhmingz cogeiz, miz doiq beixnuengx heuhguh Siengginh、Siengyinz ndeu aenvih hoenxciengq deuznanh daeuj daengz gizdieg heuhguh “daejbya” (seizneix rog doumbanj Gauhyouj) ndeu, raen gizneix ndit raeuj raemx cuk、va hom roeg gvaengx, baenzneix couh dap ranz youq roengzdaeuj, haifwz dajndaem, seng lwg sanj lan. Ngoenz ndeu, beixnuengx de hwnj ndoi guhhong, raen ndaw ndoengfaex miz geij go byaekgep maj dwk bizbwd oiqup, cimz gwn gaemz ndeu, byoiqbet habbak, baegnaiq siu bae seuqsat. Beixnuengx de couh vat ma ndaem youq reihbyaek laeng ranz, mbouj geij nanz couh maj ndaej heuswd mwncup, feih haek diemzvan, vunzmbanj raen le nyinhnaeuz gij byaekgep neix gwn le ndaej cangq ndang bouj yiengz, lij ndaej ywbingh dem, cungj daeuj cam beixnuengx de aeu dinbyaek baema ndaem, yied ndaem yied lai. Vih geiqniemh cojcoeng, mbaenj- gouz saedceij gyaeundei, moix bi cietheiq goekhawx baez daengz, byaekgep cix maj dwk noengq- nwtnwt, gyoengqvunz couh hainduj nyaengq dwk gvej byaekgep、caeq byaekgep、guhcaz hwnjdaeuj. Doengxngoenz, gyoengq dahsau youq henz naz henz rij lauz gungqnyauh; banfuemx, gyoengqde caegcaeg haeuj ndaw suen byaekgep daegmbauq (bouxhabsim) bae gvej byaekgep, ngoenz neix, gij byaekgep ranz lawz deng gvej bae ceiq lai, gangjmingz ranz de yied gitleih yied miznaj; doengxhaemh, gyoengq dahsau geij boux guhdoih roxnaeuz baenz bang dwk comz youq ranz ndeu guhcaz, caj daegmbauq bouxhabsim daeuj doiq fwen naenghhwnz… Gij fungsug gyaeundei neix gaenq daihdaih swnjcienz lienzdaemh guh le 500 lai bi, ciemhciemh gyoebbaenz le vwnzva byaekgep Gauhyouj.

Ciet vwnzva byaekgep Gauh- youj daj bi 2007 hainduj banh, itbuen moix bi cietheiq goekhawx gvaq le senj ngoenz ngoenzndei ndeu youq ndaw mbanj hoengh banh. Banh daengz seizneix, gingniemh banh ciet gaenq comz ndaej lailai, ciet vwnzva byaekgep caemh banh baenz le daiz heiq hung comz miz byaekgep dwkcuengq、gvej byaekgep mbaet mbawcaz、gaeb bya、ring- iengj gijgwn dangdieg doenghgij vwnzva dajraeq lajmbanj neix; baijyienj boq venz、danz bizbaz、dozmae、“yezyej” (daengx mbanj vunz bae mbanj wnq guhhek)、ngaizbakranz、doiq fwen naengh- hwnz doenghgij fungcingz Dungcuz neix; baijgai byaekgep、maenz doenghgij huqdoj dangdieg daengj gak cungj gak yiengh vwnzva fungsug minzcuz hozdung, hawj gyoengq hekyouz ndaw guek rog guek bae gvaq ciet haenx angq mbat gaeuq ndeu.