Mbanjlaj miz dah sau ndeu heuhguh Dahlienz, ngamq ndaej ngeihcib ngeih bi, vunz gig saundei, naj maeq lumj vadauz, nohhau lumj gyaeqmbiq, bouxcoz raen le hoenz cungj mbin liux, caezgya cungj siengj caeuq de guhyoux. Dahlienz bouxlawz goj mbouj wngq. Ngoenz ndeu bae haw, Dahlienz raen mbanjgwnz Daeg- nungz mbauqndei, couh angqfwngfwng bae ra de gangjgoj, yied gangj yied haeujmaez, yienghneix song boux doxlienh ndaej song bi, bi daihsam Dahlienz laeh bae daengz ranz Daegnungz, songde gag guhcawj doxaeu, couh baenz gvanbaz lo.

Dahlienz ndaej ngeihcib haj bi bide, seng baenz daeg lwg ndeu, heuhguh Daeglungz, vunzlai couh heuh Dahlienz gvanbaz guh mehlungz bohlungz. Daeglungz ngamq ndaej sam bi, bohlungz baenz bingh yw mbouj ndei gvaqseiq lo. Daj seizhaenx hwnj, mehlungz couh bouxdog ciengx Daeglungz majhung, baenzmaiq hix mbouj caiq haq vunz.

Daeglungz vunz maj ndaej sang, youh mbauqndei, baez yaep lwgda couh ndaej ngeihcib seiq bi, rox guhyoux lo. Dahyoux de youq Mbanjgvaz, heuhguh Dahyingj, vunz gig saundei. Daeglungz daz Dahyingj daeuj daengz ranz hawj daxmeh yawj. Daxmeh raen Dahyingj saundei lumj dahsien ityiengh, sim siengj: Vunz saundei lai rox riengraez, ngoenzlaeng mbouj dingq gangj couh nanz banh, couh doiq Dahyingj naeuz:“Daeglwg gou lij coz, ranz youh hoj, hix mbouj miz boh, ha mbouj ndaej mwngz, suenq lo.” Yienghneix, Daeglungz caeuq Dahyingj couh baenfwngz lo.

Gvaq liux bi ndeu, Daeglungz doiq daxmeh naeuz：“Gou caeuq Dahyenj Mbanjswix guhyoux, gou daz de ma hawj mwngz yawj baez ndeu baenz lwi?”Gvaq liux geij ngoenz, Dahyenj daengz ranz lo. Mehlungz raen Dahyenj bizbwdbwd, sim siengj：De vunz baenzneix hung, ngoenzlaeng miz saek di vah, roxnaeuz doxndaq doxhoenx, couh guh mbouj gvaq de bw! Couh doiq Dahyenj naeuz:“Mwngz caeuq Daeglungz mbouj doxngamj, mwngz ra bouxwnq suenq lo” Dahyenj caeuq Daeglungz youh baenfwngz lo.

Gvaq liux buenq bi, Daeglungz youh naeuz：“Daxmeh, gou youq Mbanjgyang caeuq Dahyungz dox- gyaez, de vunz saundei, guhhong youh gaenx, dinfwngz youh gvai, gou siengj aeu de guhyah, mwngz yawj mbouj yawj de baez ndeu?” Daxmeh naeuz：“Mwngz aeu baenz vaiq guhmaz, gvaq geij bi dem mbouj ndaej bw?”Daeglungz han naeuz:“Gou yaek ndaej ngeihcib roek bi, caiq gvaq geij bi couh samcib bi, mwngz doengzeiq mbouj doengzeiq? Mbouj doengzeiq gou couh bae ranz de hwnjranz. Gou bae hwnjranz le, mwngz couh gag youq ranz, mbouj miz lan umj, gou bae le, mwngz lij ndaej haujlai laex daeuj dem, mwngz siengjsiengj yawj?”Mehlungz ngeix daengz, Daeglungz boux lwgdog, bae hwnjranz, gou couh mbouj miz boux baengh, daengz geq baenzlawz guh. Siengj daengz gizneix, mehlungz han naeuz:“Mwngz aeu goj aeu de, gou mbouj guenj lo”.

(caengz sat)