Moix bi liggaeuq ndwenseiq cibsam, dwg cietbofwen Bouxcuengh Lungzcouh moix bi banh mbat ndeu, cietbofwen bineix youq yienhsingz Cunghsanh Gunghyenz guh doiq fwen doxdax, 60 lai boux canghfwen daj ndaw yienh、yienh wnq caeuq Yeznanz daeuj haenx youq gwnz daizfwen doiq fwen naemqsadsad, yinx fanh lai vunz dangdieg caeuq dieg wnq bae yienhciengz humx dingq, yienhciengz sing bekfwngz sing hemq mbouj dingz, vunzlai dingq dwk mizyinx raixcaix.

Cietbofwen Bouxcuengh Lungzcouh, caemh heuhguh “ngoenzseng fuzboh”. Riuz naeuz liggaeuq ndwenseiq cibsam dwg ngoenzseng boux fuzboh ciengginh okmingz Ciuhdunghhan Maj Yenz, Maj Yenz bi haenx daiq bing daeuj baihnamz hoenxciengq seiz cap bing youq Lungzcouh gvaq, vih hen maenh、haifat dieghenzguek laeb roengz goenglauz hung, vunz Lungzcouh vih geiqniemh de hwnjguh le “Miuh Fuzboh”. Moix bi ngoenz neix, Lungzcouh cungj banh doiq fwen、foux lungz foux saeceij、cuengq daengdah、caeqbaiq fuzboh mbaenj fuk daengj hozdung, daengz seizneix gaenq miz cien lai bi lizsij. Gyawj geij bi neix daeuj, Lungzcouh dawz cietbofwen daezswng baenz ciet vwnzva fungsug ndawbiengz, guh gak cungj gak yiengh vwnzva fungsug ndawbiengz hozdung, haenqrengz cienzyiengz minzcuz conzdungj vwnzva.

Bineix 5 nyied 10-11 hauh, liggaeuq ndwenseiq cibngeih cibsam, Lungzcouh Yen cingj le gyoengq baengzyoux Yeznanz Gauhbingz Swngj vwnzva yisuz dijyuz fuengmienh neix daeuj camgya cietbofwen bineix. Ndaw ngoenzciet, banh miz caeqbaiq fuzboh ciengginh Maj Yenz、bae gwnz Dahli- gyangh cuengq daeng’va mbaenj fuk、canghfwen song guek caemh daiz eu fwen doiq fwen, gij cuzgiuz yindungyenz Yeznanz Gauhbingz Swngj caeuq Lungzcouh Yen cix youq gwnz giuzcangz beij dik cuzgiuz……Bouxcanghfwen mbwk Yeznanz Yenjsi Yangzliuj caeuq canghfwen Lungzcouh doiq fwen sat le angq dwk naeuz: “Yinhyoz caeuq vwnzva mbouj miz gyaiqguek, gij sim raeuz doxdoeng dangqmaz.” Gak cungj gak yiengh vwnzva fungsug ndawbiengz caeuq dijyuz hozdung hawj yinzminz song guek engq roxyiuj engq depgyawj, doxgyau engq haeujlaeg, caemh ndaej doidoengh Cungh Yez song guek henzguek vwnzva lijyouz fanzyungz fazcanj.