Aen Bocaz Lingzyinz Yen dwg guekgya AAAA funghgingjgih. Dieg funghgingj gyaeundei neix youq Lingzyinz Yen Gyahyouz Cin Mbanjansiengh, haijbaz 1100 lai mij, gizde, geijcib aen dingjbo hung iq haenx, deng gyoengqvunz Lingzyinz gaenxguh haenx gvak baenz mbaek dem mbaek、coij dem coij, caiq ndaem gocaz hwnjbae. Seizneix, gwnz bocaz heuswdswd, moix bi yinx cienfanh bouxhek daeuj youz. Bocaz Lingzyinz dwg aen lijyouz gingjdenj comz mbaet mbawcaz、gyagoeng mbawcaz、gwn caz、swnghdai nungzyez gvanhgvangh ndeu, hix dwg gih raeuz buek daih’it doenggvaq Guekgya Lijyouzgiz bingzguj niemhsou guh “daengx guek nungzyez lijyouz sifandenj” ndawde aen ndeu. (Vangz Yenzyungz/黄元荣)