7 nyied 17 hauh, youq Lozcwngz Mulaujcuz Swciyen Dunghmwnz Cin Mbanjsizveiz, gyoengq bouxcoz Mulaujcuz cingq angq dwk diuq fouxlungzfiengz, yinx gyoengq bouxhek gak dieg daeuj yawjngonz, gyoengq bouxhek hix angq dwk diuq fouxlungzfiengz hwnjdaeuj. Fouxlungzfiengz Mulaujcuz lizsij gyaenanz, youq Mingzcauz gaenq miz lo, de dwg Mulaujcuz ndawbiengz aen conzdungj dijyuz hozdung hanghmoeg ndawde hangh ndeu. Lungzfiengz dwg aeu fiengz san baenz. Gyoengq beixnuengx Mulaujcuz diuq foux lungzfiengz liux le, dawz lungzfiengz ram daengz henz dah coemh bae, yienghneix guh, dwg soengq lungzfiengz daengz giz haijlungzvuengz bae, gouz binaj raemx cuk fwn swnh, gohaeux demsou, loegcuk hwngvuengh. 2010 nienz, “fouxlungzfiengz Mulaujcuz” ndaej lied haeuj swcigih buek daihsam feih vuzciz vwnzva yizcanj mingzloeg.

(Liu Gvanghfuz Veiz Yuzdai/廖光福 韦如代)