(ciep geiz gonq)

Daengz sam nyied co miz ngoenz ndeu, dingqnyi naeuz de bingh lo. Gou caeuq doengzdoih bae yihyen yawj de, seizhaenx, de gangj vah mbouj ok, raen gou le cix cengqgengz yaek gangj vah, gou boemj rwz depgyawj aenbak de, caenh dingqnyi “canh……ga……”, “canhga?” Gou dingq mbouj rox de siengj gangj gijmaz, hoeng gou sikhaek couh siengj daengz bonj saw neix. “Canhgauj”? Gou naemj, aenvih duenhgonq gou caeuq de lwnh gvaq gij saw canhgauj bonj saw neix, couh naeuz “gij saw canhgauj?” De ngaek gyaeuj dedded. Seizhaenx gou raemx- da yaek conh lo, hoeng cix nyaenx dwk naeuz:“Mwngz cuengqsim, gou rox lo, mwngz gaej you, raeuz gig vaiq couh ndaej doeg bonj saw neix……”

Ma daengz hagdangz, gou cix simfouz simcieg, sikhaek dwk dienh- vah hawj boux fucwz oksaw, cam de bonj saw neix seizlawz cij ndaej okdaeuj, gou lau Vuz lauxsae mbouj ndaej raen bonj saw neix……

Daengz seiq nyied ndawcib, Vuz lauxsae bingh haemq ndei di, ndaej ok yihyen ma ranz lo. Seizhaenx, gou bae Baekging beizyin, seiq nyied daej ma daengz Nanzningz, bonj saw neix dauqdaej ndaej cuzbanj lo.

Gou baez ndaej saw ma, daih’it gienh saeh couh dawz saw bae ranz Vuz lauxsae, byawz rox bingh de dauqfuk, gaenq bae Nanzningz louz- yih, gou couh gyau saw moq hawj dahlwg de. Ngoenz daihngeih gou caeuq doengzdoih bae Nanzningz yawj de, de gaenq byom haujlai, cengq hai da yawj dou baez ndeu, gaemfwngz dou le youh unqnemnem laep da lo, gangj mbouj ndaej vah, dou gangj de lij dingq ndaej. Gou naeuz bonj saw raeuz caez sij haenx, gaenq ndaej cuzbanj lo, deq mwngz ndang haemq rengz di couh ndaej doeg lo. De muengh gou, ngaekgyaeuj, naiqnuek- nuek, lumj ninz mbouj gaeuq nei youh laepda ninz lo.

Gou gig simsenz, Vuz lauxsae bingh dwk gangj mbouj ok vah seiz, lij yousim bonj saw neix, de mbouj cuengqsim geijlai. Daengz de haemq ndei di ma ranz, gouj cix mboujmiz seizgan bae yawj de, laihnaeuz de rox ciemh ngoenz ciemh ndei lo, yienghneix gou hix mbouj you lo. Hoeng daengz doeklaeng, bonj saw neix oksaw seiz, de lij youq, hoeng cix caengz ndaej doeg gvaq saek mbat. Seizneix, cix ciengxlwenx biek raeuz bae lo……

Vuz lauxsae ha, ciuh vunz mwngz daiq baeg lo. Mwngz betcib doxbae cix mbouj rox baeg, lij gaenx aeu Sawcuengh sij faenzcieng, caemhcaiq yied sij yied mizyinx. Gou boiqfug mwngz, gou gingqgyaez mwngz, gou engqgya ienq gou swhgeij. Dangh- naeuz bonj saw neix caiq caeux saek cib geij ngoenz ndaej soengq daengz ndaw fwngz mwngz, mwngz ok yihyen ma ranz seizhaenx couh ndaej doeg lo……

Daiq laeng lo! Seizneix, youq gizneix, gou caenh muengh mwngz youq baihhaenx an’onj, ndeindei yietbaeg ba!

(sat)