Bi 2014, Vanzgyangh Gah- swhdwz bauqaeu seiqgyaiq swyenz yizcanj ndaej baenz, couh roeb cietfaenlungz daeuj daengz, ndigah ngoenzciet hoenghhwd nauhyied raixcaix, 6 nyied 20-22 hauh youq yienhsingz banh le lai cungj lai yiengh angq hoh hozdung. Riengzlaeng 25-26 hauh youh youq ndaw yienh Yananz Yangh banh cietfaenlungz Mauznanzcuz. Gij vunz youq rog guhhong haenx cungj dauqma gvaq ciet, gij lauxhangz、 bouxmizyinx caeuq hekyouz caemh bae dem nauhyied, gij beixnuengx gaenhlaenz seiqhenz cix comz bae daengz ndaw mbanj Mauznanz, geij cien baenz fanh vunz angqyangz gvaq ciet, nauhyied hoenghhwd.

Cietfaenlungz dwg ngoenz ciet conzdungj Mauznanzcuz mbaenj saenz baujyouh fungsou ndeu, dwg beixnuengx Mauznanzcuz hangh hozdung hungloet moix bi banh baez ndeu, youh heuhguh “cietraemxfwn”. Vunz Mauznanz- cuz nyinhnaeuz moix bi liggaeuq hahceiq ngoenz ngoenzsaenz (ngoenzlungz) daih’it dwg ngoenz raemx lungz doxfaen, raemx lungz doxfaen couh mbouj ndaej fwn yinz rumz dingh, ndigah ngoenz neix yaek aeu caeq saenz bauj gomiuz, mbaenj gohaeux gogo fungsou, hozdung lienzdaemh banh song sam ngoenz.

Yananz dwg giz fathwnj Mauznanzcuz, gizneix vunz sim- soh lauxsaed, doxgiet doxhuz. Ngoenz 25 hauh, Yananz Gaiq- nduj Cietfaenlungz aen yizsi “nabvaiz” youq Mbanjsunghlangj gawjbanh, “nabvaiz” caemh heuhguh “dubvaiz”, duzvaiz deng dub haenx heuhguh “vaizmiuh”, vunz Mauznanzcuz nyinhnaeuz, mwh “nabvaiz”, gij vunz youq henz haenx cungj ndaej daengz Goengsamgyaiq baujyouh, fukheiq hwnj ndang, daengx bi seiqgeiq swnh faen swnh raemx、vuenyungz gitleih. Yizsi guh sat le, doiq fwen doxdax daengj vwnzdij hozdung couh riengzdwk guh ndaej nauh- yied dangqmaz, vunzlai mbangj dingq fwen mbangj yawj yienj heiq, angqvauvau najrongh raixcaix.

26 hauh banhaet, vunzlai youh comz youq gwnz giuzcangz Mbanjsunghlangj, guh aen yizsi mbaenjmuengh, caenh raen gwnz daizyieng cuengq miz aen gyaeujvaiz ndeu, geij boux goengsae ngon ging caeq Goeng- samgyaiq; gwnz giuzcangz baij miz haujlai aendaiz, moix aen mbanj aen daiz ndeu baij rim mouseiq、bitgaeq、haeuxnaengj haj saek daengj doxgaiq dwkcuengq, vunzlai youq ndaw sing ngon ging goengsae caez guhsax caeqbaiq, mbaenjmuengh ndaw ranz demsou vunzcaen ndang ndei vuenyungz. Banringz, vunzlai doxcaeh bae daengz laj Byacomzcaiz Mbanj- genbingz, guh aen yizsi caeqbaiq “faexdoengzsim”. Go faex neix dwg go faexreizraemx ndeu gotgop go faexdanzhenj ndeu caez maj, caemh ganjfaex mbouj caemh mbaw, saenzgeiz youh bi’ndwen geq, gyoengq vunzmbanj yawj guh faexsaenz, moix bi cungj bae laj faex siu yieng dwkcuengq. Gyoengqvunz heux couznding、raek va’nding hwnj gwnz gofaex, lij sij gij vah hohfuk hwnj gwnz baengz bae hoij hwnj nyefaex, dakgeiq maqmuengh. Youq laj “faexdoengzsim”, gyoengq bouxcoz ndaw mbanj lij cingj seiq boux vunzlaux naengh dwk caemhcaiq soengq hawj hoengzbau, yienh’ok gij fungsug gingq laux daih cienz daih Mauznanzcuz.

Dangqnaj, cietfaenlungz Mauznanzcuz gaenq lied haeuj Guengjsae raeuz minzcuz cietgingq cib daih binjbaiz ndawde aen ndeu.