Cin madaengz gwnzdieg, fanhfaed singj lo. Dahsau seizcin gaenq daeujdaengz lo, gij sing yamqdin de gaenq caegcaeg ciepgaenh raeuz, dahsau seizcin dwg boux canghdajveh hung okmingz ndeu ne! Yienghneix raeuz couh bae yawjyawj gij cozbinj de ba.

Dahsau seizcin daeujdaengz henz dah’iq, dawz nyeliux daz baenz saekheuoiq, couh lumj daenj hwnj geubuh heucit, caen gyaeundei ha!

De daeujdaengz ndaw suenva, vacouxcin henjgim hai lo, lumjbaenz cingq naeuz:“Seizcin daeuj lo, seizcin daeuj lo！” Vadauz hoengzmaeq riunyumnyum, valeiz hausaksak baijok gij oiq bonjfaenh. Ndwn youq gwnzsang baez yawj, cijraen benq hausaksak ndeu, couh lumj bu hwnj caengz didanj hausaksak nei, gig gyaeundei! Va homfwtfwt, youq ndaw heiq singjsien fouzsanq, baez raq baez raq iemq haeuj ndawsim.

Dahsau seizcin daeujdaengz ndoengfaex, cijraen gofaex gak cungj gak yiengh cingq ciengj gonq lau laeng dwk baijok nye oiq bonjfaenh, de hawj gofaex daenj hwnj buhheu, cungj bienqbaenz heuoiq, caen gyaeu ha!

De daeujdaengz gwnz diegnywj, cij raen gyangdoengh gvangqlangh hix daenj hwnj diuz buh heuswdswd, gyoengq lwgnyez youq gwnz diegnywj naengh dwk ninz dwk, miz mbangj doxringx, miz mbangj youq gwnz diegnywj doxgyaep, lij miz mbangj ninz youq gwnz nywjiq heuswdswd dak ndit, gyoengqde angq raixcaix.

Dahsau seizcin caen ak, de lumj boux mohsuzswh ndeu, dawz gwnzdieg bienq ndaej moqsaksak! Dahsau seizcin caen ak, veh ok fuk veh geijlai gyaeundei ha!(指导老师：彭君星)