Moix bi liggaeuq ndwenseiq ndawco ndawcib, gyoengq beix- nuengx Yizcuz Nazboh Yen cungj cangndang moqsup gyaeuget, comz youq diegdangz ndaw mbanj, angqvauvau gvaq ngoenzciet “cietdiuqgung” bi gvaq mbat ndeu neix, daihgya humx dwk baenz hop baenz gvaengz, roq nyenz roq gyonglaz, boq aen swnghhozloz, diuq fouxyatdiuq, aeu lai cungj lai yiengh hingzsik angq gvaq ngoenzciet, cuengqcaeq goengcoj, mbaenj ndaw bi moq rumz dingh fwn yinz、gohaeux fungsou, gyoengqvunz bingzan vuenyungz gvaq saedceij.

“Cietdiuqgung” dwg beixnuengx Yizcuz rangh Nazboh Yen ngoenz ciet conzdungj daegbied daj ciuhgonq couh miz ndeu, dawz gij yizsi cuengqcaeq goengcoj、go foux ndawbiengz、dijyuz doxdax daengj hozdung doxhab hwnjdaeuj, banh ndaej nauhyied hoenghhwd. Yizcuz aen yienh neix cujyau dwg comz youq Cwngzsiengh Cin Dazlaz、Nenbiz、Cejsiengz caeuq Yavaz Gunghse Bohvuj daengj cunhmbanj, gak aen mbanj ngoenz gvaq ciet cix mbouj doxdoengz, itbuen cungj dwg youq moix bi liggaeuq ndwenseiq ndawco ndawcib gawjbanh, laebdaeb gvaq 3 ngoenz, dwg Yizcuz gij ciet ndaw bi haenx aen ciet gvaq ndaej ceiq hoenghhwd ndeu. Aen ciet neix nyuenz dwg aen hozdung hung niemhngeix gij goenglauz maenh’ak goengcoj, doeklaeng bienqbaenz ngoenz ciet aeu niemh goengcoj、guh’angq、 doxdax caeuq yienjheiq guh cawjdaez ndeu. Riuz naeuz Yizcuz miz boux goengcoj ndeu, youq ciengz hoenxciengq daiq gyoengq beixnuengx hen dieg mbanj bauj bingzan ndeu ndawde deng vunzdig humxlaengz youq ndaw benq faexcuk ndeu, gig yungyiemj, doeklaeng gyoengqde raemj faexcuk guh fagnaq, nyingz dwk vunzdig daidai siengsieng buetdeuz mbouj gib, hoenx ndaej hingz dauqma daengz ndaw mbanj, daihgya cungj caez diuq ha ciengq ha dwk angq hoh, couh baenz le “cietdiuqgung”, daihlwglan vih geiqniemh ciengz ciengq ndaej hingz neix, caemh bibi gvaq ciet, daengz seizneix gaenq miz baenz cien bi lizsij. “Cietdiuqgung” 2007 nienz gaenq lied haeuj swcigih feihvuzciz vwnzva yizcanj swnjcienz baujhoh mingzloeg.

Youq Nazboh Yen, “ciet- diuqgung” banh ndaej ceiq nauhyied ceiq hoenghhwd dwg Mbanjdazlaz, mbanj neix liz yienhsingz 14.5 goengleix, moix bi liggaeuq ndwenseiq cogouj daengz cib’it gvaq ciet. Gij hozdung ngoenzciet caemh miz lai cungj lai yiengh, aeu caeq saenz caeuq yienj heiq diuq foux guhcawj, ngoenz daih’it dwg comz caeq goengcoj caeuq saenzmbwn saenzdeih; cuengqcaeq hozdung sat le couh comz youq diegdangz gyang mbanj diuq fouxcukgim, yienj gij ciengzmienh ciuhgonq goengcoj hoenxciengq ndaej hingz dauqma. Ngoenz daihngeih youh bae gak ranz gak hoh diuq, doxcaez goenghoh saedceij vuenyungz. Ngoenz daihsam caez guh “samhaet”, vunzlai doxcaeh bae gwnz bo caeq goengqbya.

Ndaw ngoenzciet, gyoengq beixnuengx Yizcuz gaj mou gaj bit doxcomz gwn ngaiz, ranzranz angqyangz vuenyungz; youq gwnz diegdangz, daihgya cix angq dwk diuq gij foux bonj minzcuz gag miz haenx, boq aen swnghhozloz gag guh, roq aennyenz ciuhgonq louz roengzdaeuj, angq ha riu ha, sing go sepset rwenzred, sing riu goksad haprwenz, angqyangz nauhyied.