Hozciz Si Ginhcwngzgyangh Gih Daihhaj Siujyoz lai bi daeuj, ciuqei aen yauyin “gouz caen、coengz ndei、gyaez gyaeu”, cizgiz sizcenj aen sonhag lijnen “gvensim moix boux hagseng ndaej cienzmienh cinbu, fatyienh、fazcanj moix boux hagseng dwzcangz”, gaengawq hagdangz fazcanj youhsi, roengzrengz gensez aen hagdangz miz minzcuz daegsaek sonhag ndeu. Hagdangz yawjnaek hong minzcuz conzdungj vwnzva gyauyuz haeuj hagdangz, dawz minzcuz conzdungj vwnzva gyauyuz yungz haeuj gwnz dangz bae, youq ndaw hagdangz gaihcanj moix haggeiz hag ciengq diuz go minzcuz ndeu、hag diuq aen foux minzcuz ndeu、hag guh aen minzcuz yisuz cozbinj ndeu、hag lienh aen minzcuz dijyuz hanghmoeg ndeu、liujgaij aen minzcuz fungsug ndeu daengj “haj aen it gunghcwngz” hozdung, hawj goq minzcuz vwnzva ndaem rag youq ndaw hagdangz laeglum bae, sawj gyoengq hagseng gyalaeg lijgaij minzcuz vwnzva, sawj hagseng gag rox cienzswnj caeuq fazyangz minzcuz vwnzva. 2011 nienz, aen hagdangz ndaej bingz guh buek daih’it daengx guek cungh siujyoz Cunghvaz youhsiu vwnzva yisuz cienzswnj hagdangz. Bi- gvaq, ndaej senj guh swcigih minzcuz vwnzva gyauyuz canggen sifan hagdangz.