6 nyied 23 hauh, Duh’anh Yauzcuz Swciyen youq Yaau Cin Dahyauzlingj Biuvaij Gingjgih hoengh banh cietcuzcu Mizlozdoz Yauzcuz hozdung, 3000 lai boux beixnuengx Yauzcuz caeuq gij ginzcung aen minzcuz wnq angq comz youq giz ndeu, ciengq go diuq foux angq gvaq ngoenz ciet conzdungj neix, cuengqcaeq buzcoj Mizlozdoz, niemhngeix gij aendaek cojcoeng.

Ngoenz ciet, cawz cuengqcaeq buzcoj Mizlozdoz le, lij banh miz riulaeuj、dwkgienz biujyienj、nyingz naq doxdax、roeg doxdoj、gaeq doxdoj、diuq fouxnyenz、doiq fwen daengj hozdung dem. Doengxhaemh, gyoengqvunz hopngomx comz youq henz doifeiz, dingq vunzlaux Yauzcuz ciengq go haenhdanq Mizlozdoz, gyoengq vunzlaux doq ciengq doq gwn laeuj, gwn fiz go engq gok.

Gij vwnzyi biujyienj bineix, engq “doj” engq mizyinx, cezmuz ca mbouj lai dwg gyoengq ginzcung gak yanghcin gag bien gag yienj, gij doih biujyienj cungj dwg aendoih biujyienj nungzminz, gyoengqde gonqlaeng yienj le 《Golaux Mizlozdoz》、《Go Gingqlaeuj Yauzcuz》、 《Angqyangz Mbanjyauz》、《Fouxnyenz》 daengj vwnzyi cezmuz, lij baijyienj le dinfwngz cauhguh conzdungj ndawbiengz caeuq vwnzva conzdungj dem, baijyienj ok gij fungcingz minzcuz caeuq gij yinx vwnzva Bunujyauz Duh’anh, yienh’ok gij daejrom nanwt vwnzva minzcuz Duh’anh, hawj gyoengq hekyouz bae yienhciengz haenx ndaej yawj mbat gaeuq ndeu, caenhcingz yiengjsou gij vwnzva minzcuz daegsaek naekgywggywg neix.

Daj bi 2008 gvaqdaeuj, cietcuzcu Bunujyauz Duh’anh couh daj cijdan guh cuengqcaeq yizsi, daezswng baenz le aen cietgingq vwnzva hozdung aeu vwnzva minzcuz caeuq cingsaenz seizdaih doxhuz giethab hwnjdaeuj ndeu, hozdung neiyungz caemh demgya le haizgiegraez doxdax、dwkgyangq doxdax、ngaizdoxcomz Ranzyauz、vwnzyi minzcuz yienjok caeuq dinfwngz conzdungj ndawbiengz minzcuz baijyienj daengj. Daengz bi 2014, cietcuzcu Bunujyauz Duh’anh gaenq lienzdaemh banh baenz 13 gaiq.