Ngamq hwnj sam nienzgaep ngoenz daih’it, daxmeh couh cawx gonj gangbit gyaeundei ndeu hawj gou.

Gangbit ndang daenj buhhoengz, cungqgyang cug diuz saihwet henjgim ndeu, gwnz saihwet veh duz roeglwg ndeu, de aj bak dwk, lumj cingq doiq gou naeuz：“Bouxcawj iq, bouxcawj iq, mwngz itdingh yaek sij cih ndei lo!”

Hai supbit, couh yawjraen bakbit soemsetset haenx ndongqrikrik, maeg hom daj bakbit iemq okdaeuj. Baenq hai ndangbit, cijraen diuz guenj unqnemnem, haenx couh dwg aen dungx de. Danghnaeuz de dungx iek lo, couh dingz guhhong, yungh hengzdoengh daezsingj gou：“Bouxcawj iq, hawj gou gwn yinjliu ba!”Yienghneix gou yungh song lwgfwngz nep aen dungx de, dawz gyaeujbit cuengq haeuj ndaw bingzmaeg bae, caiq soeng fwngz, mbat nep mbat soeng, de “gudung gudung” gwn imq lo, youh laebdaeb mbouj lau dwgrengz mbouj lau vunz ienq dwk bang gou sij cih.

Gangbit bang gou haujlai haujlai. De hawj cozyez gou ndaej haujlai baez youhsiu; hawj gou gaujsi ndaej bak faen baez dem baez. Gou gig docih de, hix gig insik de. Baeznaengz sij sat le, gou cungj gibseiz daep supbit, lauheiq mbouj siujsim bungq de vaih lo. Mbouj guhhong seiz, de couh cwxcwx caihcaih ninz youq ndaw habbit gou, caeuq gou ngumh mbouj liz ngaeuz.

O, gonj gangbit gou ceiq gyaez, bouxdoih ceiq ndei gou!

(指导老师：潘红玲)