Daxgoeng:

Mwngz ndei!

Aen ciet daxmeh couh yaek daengz lo, gyoengq doengzhag cungj aeu mbaw gajceij caijsaek daeuj guh mbaw hohgaj soengq hawj daxmeh swhgeij, hoeng, mbaw hohgaj gou dwg soengq hawj mwngz. Daxgoeng, mwngz gvensim gou, ciuqgoq gou, gou caen siengj got mwngz ndaetndaet dwk heuh mwngz “daxmeh” sing ndeu.

Geiqndaej ngoenzseng gou haenx, dingjlingz aenmbwn mbouj couh, fwnhung doeksasa, ndawsim gou ngeix:“Gij fwn doek baenz yienghneix haenq, aen dangauh ngoenzseng gou haengjdingh mbouj ndaej cawx lo!”Gou youq gwnz laeuz daihsing hemq:“Goeng ha, cawx dangauh mbouj caengz?”Gou daengj haujlai naih,cungj mbouj dingqnyi mwngz han coenz ndeu. Gou youh ngeix:“Seizneix gaenq dwg banhaemh lo, daxgoeng itdingh youh bae laeng lauxdoengz de gwn laeuj lo, caen dwgcaengz!”Fwnhung dingz lo, gyoengq doengz- doih gou daeuj lo, gou naj raezrangrang, bak soemsuetsuet dwk naeuz:“Dauqma ba, ngoenzneix gou mbouj gvaq ngoenzseng lo!” Gangj dwk gangj dwk, raemxda couh conh okdaeuj sadsad. Gyoengq baengzyoux naeuz:“Suisui, mbouj youqgaenj, raeuz ciengq diuzgo 《Go Ngoenzseng》hawj mwngz dingq.” Gou daej oksing dwk naeuz:“Ciengq go miz gijmaz yungh?” Mbouj rox mwngz seizlawz byaij hwnj laeuz daeuj, riuhaha dwk naeuz:“Yo! Gvaq ngoenzseng lij daej?”Gou yinx haeuj laeng mwngz bae,daihsing swenj naeuz:“Mwngz lo, mwngz mbouj cawx dangauh hawj gou!”

Mwngz gvaqdaeuj gaem fwngz gou daiq gou daengz bakcauq, vix haeuj aen binghsiengh bae naeuz:“Hai binghsiengh yawjyawj.”Gou baez hai aendou binghsiengh, va, aen dangauh ndaw binghsiengh youh hung youh gyaeu, gou sim’angq dangqmaz! Dax- goeng, mwngz riu dwk lumhlumh aen’gyaeuj gou naeuz:“Suisui raeuz youh majhung bi ndeu lo!”

Daxgoeng, mwngz doiq gou yienghhaenx ndei, gou itdingh dingq- vah, ndeindei hagsib. Daxgoeng, daengz gou majhung le, gou yaek roengzrengz guhhong, ndeindei ciuq- goq mwngz, hawj mwngz ngoenzngoenz miz noh gwn、miz laeuj ndumq.

Daxgoeng, gou gyaez mwngz!

Bouxlan mwngz: Vangz Yingzsui

×× nienz ××nyied ×× hauh

(指导老师： 黄春菊 韦春明)