Byanae Li’gyangh ndeiyawj raeuh,

Naegiet lumj caw geij cien dab;

Dieb gwnz gauhyenz sang dingj mbwn,

Bya wnq daeuj beij baenz ndoi nyaeq.

Hot sei neix dwg hakdoj Yenzcauz coh heuh Lij Gingh sij daeuj danq Byanaeyilungz. Byanaeyilungz youq baih saebaek Li’gyangh 15 goengleix, benz byanae itcig dwg aen siengjmuengh lai bi gou. Seizhah bae daengz singzgeq Li’gyangh youz, dangyienz noix mbouj ndaej bae benz Byanaeyilungz.

Byanaeyilungz dwg youq henz- bien Cingh Cang Gauhyenz, gvihaeuj diegbya Hwngzdon. Haijbaz dingjbya de sang miz 5596 mij, dieg daegbied de yienznaeuz depgyawj cizdau, hoeng lij hawj dingjbya de daengx bi giet nae.

Daengz lajdin byanae gou cij rox, youq baihneix yaek yawjngonz naegiet sien aeu naengh lanjceh hwnj daengz dieg bingzdaiz hung gwnz bya, daengz gwnz de le cix miz roen hawj vunz benz hwnjbae daengz dieg naegiet, hix nanzgvaiq Ciz Yazgwz boux lij- hingzgyah mizmingz neix, bide daengz neix lij dauq ndwi ne. Daujyouz daezsingj naeuz, aenvih heiqyangj dingjbya hamzliengh noix caemhcaiq givwnh daemq, daengq dou ceiq ndei ciq buhyijyungz roxnaeuz cawx bingz heiqyangj dawz riengz ndang. Gou ciq ndei buhyijyungz le, riengz daujyouz naengh lanjceh hwnj gwnz bya bae.

Ndoeng faexyinzsanh dinbya go- go maj ndaej youh sang youh soh, daj yiengh de yawj ok gyoengqde maj youq neix gaenq miz geij bak bi lo. Lanjceh lumjdwg dawz gou daiq haeuj conghseizgan nei, cib lai faencung hawj gou daj seizhah haeuj daengz seizdoeng: Daxbaenh lij dwg daenj geu buh mbang dog, seizneix daengz gwnz bya gaenq dwg buhyijyungz longz gwnz ndang lo.

Aen bingzdaiz hung dap youq gwnz datlingq. Ndwn gizde yawj coh seiqhenz, cawzhai cujfungh byanae, doengh goengqbya cungj youq laj da caez. Gizde miz diuz roenbenjfaex ngutngeuj ndeu dawz sam aen bingzdaiz yawj gingj hopheux lienz hwnjdaeuj. Benz daengz aen bingzdaiz daihngeih doxhwnj cij miz gingjnae hawj vunz yawjngonz.

Nanzgvaiq vunz heuh dieg haijbaz sang dwg dieggimq sengmingh lo, seiqlengq cungj dwg ndoqliuliu mbouj miz saek yiengh doenghgo. Rumzbya ci daeuj fwdfwd hawj mwngz naj gyoet fwngz dot, caeklaiq miz buhyijyungz daeuj dingj nit. Riengz roenbenjfaex byaij geij bak mij couh daengz dieg bingzdaiz daihngeih.

Gizde gaenq comz miz haujlai hekyouz, gyoengqde cungj ngaiz gak yiengh gingj naegiet yinx dwk danq- haenh mbouj dingz. Haeuj gyawj baez yawj, naegiet lai cungj lai yiengh: Miz lumj suijcingh; miz lumj faggiemq; miz lumj saeuranz, hawj mwngz roxnyinh lumjdwg byaij haeuj ndaw gunghden bae yawjngonz yisuz- binj nei. Yawjraen gijneix, caen dwg gyo’mbaiq daswyenz hawj vunzbiengz daiq daeuj baenzneix saenzgeiz caeuq gyaeundei ha! Mwngz ngengrwz bae dingq……singraemx laelele mbouj rox yiengj ok gyawz daeuj. O! Laxlawz dwg miz raemxnaecieg daj laj caengz naegiet lae gvaq ne! Sing raemxlae hawj dieggimq sengmingh daiq daeuj hot go sengmingh ndeu.

Dienheiq byanae bienqvaq vaiqvwd, ngamq yawj ndaej haeujyinx, mbwn sikhaek amq roengzdaeuj lij doek fwnraq dem. Daujyouz gip- muengz coi dou gang liengj dangj fwn, naeuz youq gwnz byanae ngaiz fwn rwed dwg gienh saeh gig yungyiemj ndeu.

Fwnraq ngamq dingz, raemx- mok gyuemluemz, daengx goengq byanae couh lumj daenj geu buhsa moengzloengz nei. Daujyouz naeuz gingjsaek baihgwnz engq ndei yawj, mboujgvaq de youh daezsingj, danghnaeuz byawz rengzndang mbouj doh, ceiq ndei mbouj benz hwnjbae lo. Yienghneix dou caiq riengz daujyouz benz coh dieg bingzdaiz daihsam. （caengz sat）