Moix bi liggaeuq ndwengouj ngeihsam, Vujmingz Yen Ganhhih Cin Mbanjnazvang cungj hoenghhwd gvaq aenciet hoihmiuh Miuhgoekraemx, hawj aen mbanjbya iq gyaeundei neix nauhyied dangqmaz. Gyoengq vunzlai daeuj camgya hoihmiuh haenx, mboujdan bae ndaw Miuhgoekraemx soengq fuk neix mbaenj fuk, caemh cwxcaih dwk bae yawj gingj gyaeundei cuengq soeng faenh sim ndeu.

Mbanjnazvang youq henz roen gauhsuz Duh’anh daengz Namzningz, dwg aen mbanjlaux ndeu, gizneix bya heu raemx saw, ngaeuz bya dauqdingq ingj ndaw raemx gyoebbaenz fuk veh ndeiyawj ndeu. Miuhgoekraemx caemh heuhguh “Miuhdaihvuengz”, henz mbanj miz Nazvang、Daemzvang song aen suijgu, aen baek aen namz, lajdaej miz conghgamj doxdoeng, laj dinbya Byanazgyaiq miz aen mboq ndeu baenz bi seiqgeiq bauq raemx okdaeuj lae haeuj ndaw daemzlaeg, con haeuj ndaw conghgamj caiq lae haeuj ndaw suijgu, doeklaeng lae coh baihsaenamz haeuj mbanj dwk naz, ciengx gyoengq beixnuengx Bouxcuengh diegneix daih dem daih, baenzneix gyoengqvunz couh youq giz goekraemx guh miuh baiqsax “lungzvuengz”, gyo’mbaiq “lungzvuengz” soengq fuk daengz gwnzbiengz, hawj gij mbanj rangh neix gohaeux fungsou. Seizneix, vunz Nazvang dawz Nazvang Suijgu caeuq mieng ndaw conghgamj haifat baenz gizdieg lijyouz, souhaeuj mboujduenh demlai.

“Hoihmiuh Miuhgoekraemx” Mbanjnazvang dwg youq gyoengq vunzlaux ndaw mbanj guhdaeuz comz ngaenz banh hwnjdaeuj, aeu cungj hingzsik banh miuhhoih daeuj dazyinx vunzlai gyaez goekraemx, gyaez ranzmbanj, hen ndei benq saekloeg ciuhnduj louz roengzdaeuj neix, cauxfuk daihlaeng. Ngoenzciet, ndaw mbanj cungj cingj goengsae daeuj daiq vunzlai caeqbaiq Miuhgoekraemx, riengzlaeng couh hoenghhwd guh gij hozdung doiq fwen、yienj heiq、baijyienj fungsug Mbanjcuengh, dwk lamzgiuz doxdax daengj lai cungj lai yiengh vwnz dij hozdung. Cawz vunzlai ndaw mbanj caeuq gij mbanj henzgyawj le, lij miz gij hekyouz daj Namzningz、Yilinz、Hozciz daengj dieg daeuj haenx caemh bae baiqsax “lungzvuengz”, cetyawj yiengh mbanj gyaeundei, bae yawjngonz gij gingj ndeiyawj henz mbanj, caemh sim’angq simsangj raixcaix.