Yaek cuengqhag lo, banhcujyin Cinz lauxsae byaij haeuj gyausiz daeuj, fajnaj rag ndaej raezrangrang. Yo, mboujrox dwg lwg manzgyaengj lawz youh daujluenh lo. Gyoengq doengzhag sikhaek naengh ndaej sohswd. Cinz lauxsae cam:“Ngoenzneix banhaet Vangz lauxsae hwnj dangz yijvenz, sou riu gijmaz?”

“Hi hi hi hi hi!”

“Sou lij riu! Ngoenzneix dwg bouxlawz daiqdaeuz daujluenh? Swhgeij gag ndwn hwnjdaeuj ba!”

Cinz lauxsae bingzciengz caeuq gyoengqraeuz gig doxndei, cix lumj daxmeh youh lumj baengzyoux, coengzlaiz mbouj luenh fat beizheiq gvaq. Daihgya cungj nyeux gyaeuj yawj coh Lij Mingz bae, daeg manzgyaengj neix lij goemq bak riuhihi ne!

De ndwn hwnjdaeuj naeuz:“Lauxsae, gou mbouj dwg daeg- daengq yaek riu Vangz lauxsae, dwg de itmienh doeg hot seigeq itmienh wij, o, couh lumj yienghneix: w, w, 碧玉（wk）装成（wk）一树高， 万条垂下（wk）绿丝绦（wk），hi hi hi hi.”

“Lij Mingz, wij couh baenzlawz la? Lauxsae couh mbouj ndaej wij la? Gyoengqsou yienghneix riu lauxsae doiq lauxsae caen mbouj aeueiq ya！”

“Mbouj dwg, gizsaed Vangz lauxsae ngoenzlwenz banringzgvaq hwnjdangz seiz couh wij lo, ngoenzlwenz gyoengqraeuz mboujmiz saek boux riu de, hoeng, ngoenzneix de lij wij mbouj dingz, gou caenh gangj gawq：Meh ha, Vangz lauxsae gwn lai lo, wij baenz ngoenz mbouj rox dingz. Daihgya dingqnyi le couh riu hi hi hi lo.”

Gyoengq doengzhag cungj nyaenx mbouj ndaej riu cumcum hwnjdaeuj. Sawqmwh sing riu mboujmiz lo, aenvih daihgya yawjraen lwgda lauxsae hamz raemxda dwk, de naeuz:“Gyoengq doengzhag, sou rox lwi, gij bingh dungxin Vangz lauxsae gig yenzcung, gaenq fazcanj daengz veiaiz lo. Cijaeu de baez dwgrengz gvaqlai, mboujdanh wij, aendungx lij in dwk ndwn cungj ndwn mbouj baenz. Vangz lauxsae hajcib lai bi lo, gyoengqraeuz heuh de daezcaeux duiyouh, hoeng de naeuz daj it nienzgaep son sou daengz seizneix, sij mbouj ndaej vut sou bae ha! Gyoengqsou sieng aensim Vangz lauxsae, de caen siengj duiyouh baema ranz lo.”

Gyoengq doengzhag dingq le cungj daej hwnjdaeuj. Cuengqhag le, daihgya cungj mbouj baema ranz, mwngz coenz gou gawq lwnh hwnjdaeuj. Miz mbangj naeuz:“Ai! Vangz lauxsae wij gou caen mbouj wangdang riu de, gwnz seiqgyaiq miz gij yw ienq gai couh baenz lo!”Miz mbangj naeuz:“Baezlaeng bouxlawz lij riu Vangz lauxsae, couh hawj de sij 20 faenh genjdauj.”

Lijmiz mbangj naeuz:“Deng deng deng, bouxlawz lij daujluenh dawz Vangz lauxsae gik deuz, couh hawj de boiz!”

Ngoenz daihngeih, Vangz laux- sae ngamq byaij haeuj gyausiz, yo, gwnz gyangjdaiz cuengq miz hung- hung iqiq geijcib aen hab. A! Dwg yw dungxin, moix aen hab gwnzde cungj nem mbaw saw ndeu:Vangz lauxsae, gi yw dungxin bienfueng neix gig lingz.

“Vangz lauxsae, hoh mwngz ndang cangq!”

“Vangz lauxsae, cingj mwngz yienzliengh.”

“Vangz lauxsae, gou itdingh roengzrengz doegsaw, daengzcog dang boux yihyoz bozsw ndeu, yw ndei gij bingh mwngz!”

Yi, lijmiz aen guenqsozliu douqmingz ndeu, ndawde miz 46 aen hing’yinsingh, gwnz bingz nem miz mbaw ceijdiuz ndeu sij naeuz: “Vangz lauxsae, raeuz gyaez mwngz!”

Gyanghaemh, gou ninz youq gwnz congz, loq raen swhgeij ndaej dang boux yihyoz bozsw. Gou yenzcauh ok cungj yw ndaej yw aizcwng ndeu, daj haenx gyoengqvunz caiq mbouj yungh nyaenxsouh gak cungj bingh caeuq indot. Ndaw moengh, gyoengqraeuz caeuq Vangz lauxsae riu dwk simhai bae.

(指导老师：黄春菊)