Haetnaengz roek diemj buenq, gyoengqvunz ngamq hwnqcongz，yawj diuzloh mbanj，couh mumjgyumq yawjraen aen ngaeuzndang hungsang ndeu, ndang daenj mizcaijfuz，fwngz gaem sauqbaet，mbouj dingz dwk sauq roen. Mbouj geij nanz，aen lahgizciz rog mbanj swng hwnj baenz geu baenz geu hoenz. Boux vunz neix couhdwg bohlungz gou，hix dwg cunhcangj mbanj raeuz.

Bi’gvaq, aen mbanj raeuz gaih- cenj “Vujmingz Gyaeundei, Laj- mbanj Cinghseuq”hozdung, bohlungz gou gig yungjhu hangh gunghcwngz doiq nungzminz miz ik neix, cizgiz bae guh, caemhcaiq deng senj guh baujgezyenz. De gag ok cienz cawx sauqbaet、doengj、lahgizcanj daengj hongdawz.

Hozdung ngamq gaihcanj seiz, vunzmbanj lij caengz siengj guh, gij sibgvenq rwix mbangjboux vunz- mbanj lij gaij mbouj ndaej, ciengzseiz miz vunz dawz nyapnyaj roxnaeuz boeg youq henz roen, roxnaeuz boeg youq henz daemz, roxnaeuz boeg youq bakmbanj. Danghnaeuz bohlungz mbouj raen boux boeg, swhgeij couh mbouj ok sing sauq seuq. Danghnaeuz de bungz boux boeg, couh naihsim dwk gangj cwngcwz, gangj ndeicawq.

Miz ngoenz ndeu banringzgvaq, bohlungz ciuq laeh gaem sauqbaet caeuq lahgizcanj okbae dajsauq, ngamq byaij daengz bakmbanj, cingq yawjraen Daeggvangh——boux ndaw mbanj ceiq gaemhmengz he youq henz roen boeg doengj nyapnyaj ndeu. Bohlungz sikhaek byaij daengz henz ndang de, unqswnh dwk naeuz：“Daeggvangh, nyapnyaj mbouj ndaej boeg youq gizneix, wnggai boeg haeuj lahgizciz bae.”Siengj mbouj daengz Daeggvangh mboujdanh mbouj dingq, lij singhung hemq hwnjdaeuj：“Yu, mwngz miz maz gienz guenj gou, neix dwg dieg ndaw mbanj, gou gyaez boeg gizlawz cungj ndaej, mwngz guenj mbouj daengz!” Gangj sat, lij nyoengx bohlungz mbat ndeu. Bohlungz baez soenx, ca di ngaiz laemx. Seizneix, haujlai vunzmbanj humx gvaqdaeuj, mwngz coenz gou coenz, cungj naeuz Daeggvangh. Mizmbangj naeuz：“Danghnaeuz bouxboux lumj mwngz yienghneix luenh boeg nyapnyaj, aen mbanj raeuz couh bienqbaenz lahgizcangz lo.”Mizmbangj naeuz：“Miz lahgizciz lo, mwngz lij boeg gizneix, mwngz dwg daegdaengq gauj buqvaih!”…… Daeggvangh raen vunzlai cungj naeuz swhgeij mbouj deng, najhoengz dwk ngaemgyaeuj roengzdaeuj. Bohlungz lij dwg unqswnh dwk doiq de naeuz：“Daeggvangh, mwngz rox lwi? Mbanj raeuz couhdwg aen ranz hung he, cijmiz bouxboux gangj veiswngh, aen ranz raeuz cij ndaej cinghseuq、gyaeundei.” Daeggvangh ngiengx gyaeuj hwnjdaeuj, najgaej dwk doiq bohlungz naeuz：“Cunhcangj, doiq mbouj hwnj, gou loek lo, cingj mwngz yienzliengh.”Caezgya dingq le bek- fwngz hwnjdaeuj. Daeggvangh ngeng aen doengj roengzdaeuj, yungh fwngz dawz nyapnyaj bued haeuj ndaw doengj bae, bohlungz hix bangcoh sauq hwnjdaeuj. Yawj Daeggvangh byaij bae lahgizciz, bohlungz habhoz dwk ngaekngaek gyaeuj.

Daengz seizneix, hozdung gaenq gaihcanj ndaej bi lai lo, miz bohlungz daiq, gyoengq beixnuengx cungj gyahaeuj hangh hozdung neix. Seizneix, bohlungz moix ngoenz cungj sauq roen mbanj, sousib nyapnyaj, dingh seizgan coemh nyapnyaj. Aen mbanj raeuz bienq ndaej engq seuq lo, raemx bienq ndaej engq saw lo, faex bienq ndaej engq heu lo, mbwn bienq ndaej engq lamz lo. Gyoengq beixnuengx haenh bohlungz dwg “Lajmbanj Meijyungzswh”!

(指导老师：潘文清)