6 nyied 18 hauh banhaet, vih geiqniemh 6 nyied 26 hauh ngoenz gozci gimq doeg (ngoenz gwnzbiengz heuh vunzlai gaej nem huqdoeg), nyinhcaen guh ndei hong senhconz gyauyuz vunzlai gaej nem huqdoeg, Liujcwngz Yen Fulenz、Ginduzban、Minzcuzgiz lienzhab youq yienhsingz Bwzyangz Gvangjcangz gawjbanh Fwencuengh doxdax, baez doxdax neix aeu“mbouj hawj huqdoeg haeuj ranz raeuz” guh cawjdaez.

Ciuq cam rox, eu “Fwencuengh” gaenq baenz gij hozdung dangdieg gak cuz ginzcung ngoenznaengz gyaezmaij、gag guh gag angq de. Baez neix“Fwencuengh”doxdax gungh miz 14 aen dui camgya, doenggvaq gyoengqde souj dam souj dwk eu“Fwencuengh”, daengq vunzlai aeu gyaez mingh、mbouj nem huqdoeg, neix dazyinx gyawj fanh vunz ngonzyawj. Youq hozdung yienh- ciengz, doenghboux gag nyienh guh hong gimq doeg nem doenghboux gunghcoz yinzyenz fat 4000 lai faenh senhconz swhliu hawj vunzlai. Baez hozdung neix dawz senhconz gimq doeg nem vwnzva minzcuz ndawbiengz doxhab hwnjdaeuj, hawj vunzlai roxyiuj danghnaeuz nem duzbinj couh vaih mingh、vaih ciuhvunz, aeundaej yaugoj ndei. (Veiz Ginzvah/韦群花)