Ndwen gonq, gou miz caijsoq ndaej bae daengz Gveilinz Si Lingzconh Yen Giujvuz Cin Gyangh- douzcouh Cunh aen mbanj ciuhgonq Cungguek gaujsenj bouxguhhak ndaej ceiq ak haenx, youq ndaw “vwnzva gyaez va’ngaeux” caemx mbat ndeu, yawjraen lailai, siengj- ngeix caemh lailai.

Mbanjgeq Gyanghdouzcouh daengx mbanj miz 120 lai ranz gungh 700 lai vunz, 90% doxhwnj singq Couh. Ciuq sawgeq aenmbanj geiq naeuz, goengcoj singq Couh aen mbanj neix Couh Siuvang dwg daih 14 daih lwglan guek raeuz ciuh Bwzsung boux vwnzyozgyah、cezyozgyah okmingz Couh Dunhyi, youq mboengq gyang Hungzvuj yenznenz Ciuhmingz （1368 nienz）couh daj Huznanz Daucouhfuj Yingzdau Yen okrog guhhak doek- laeng daengz Gyanghdouzcouh youq roengzdaeuj, gvaq saedceij sanj daihlaeng ungganq yinzcaiz. Gij lwglan singq Couh Mbanjgyangh- douzcouh, ciuqei gij son’gyauq goengcoj Couh Dunhyi:“Ndaw boengz didmaj mbouj uq boengz, raemxsaw swiq cingh mbouj iu ndiengq.” Doq raeq nazreih doq son saw ciengx lwglan. Daj Ciuhcingh Genzlungz nienz gvaqdaeuj, aen mbanj neix gonqlaeng gauj hwnj siucaiz geij bak vunz, gijyinz 31 vunz, cinsw 8 vunz, sugizsw 13 vunz; daengx mbanj gungh ok bouxhak 168 vunz, dang daengz hajbinj doxhwnj miz 3 vunz, gizdieg guhhak sanq doh daengx guek. Gou baez byaij haeuj ndaw mbanj, couh gamjsouh daengz cungj heiq sohswd ciuhgeq aenranz mizmingz haenx, daegbied dwg gij ranz cien heu vax mong、sanranz hungsang、sangsang daemqdaemq、yiemhranz doxdaeb、yienghceij gaeuqgeq、dou cueng deu va、roen iq rinraiq… Gijneix cungj yienh’ok gij daejna vwnzva lizsij ranzcaep ciuhgeq Yenz Mingz Cingh sam ciuh neix. Aenmbanj ing bya dep raemx, yiengh gingj gyaeundei, seiq mienh byasang hophumx, lumj boux bing nei hen maenh daengx mbanj; baihnaj aenmbanj dwg doenghnaz gvangqlangh bingzbwd ndeu, sam diuz dah iq raemxsaw laeretret hopngomx aenmbanj lae coh baih- namz; baihlaeng mbanj bya loeg faex heu, faexgeq sang’vid. Giz ceiq yinx vunz de cix dwg gwnz goemqdou ndaw mbanj cungj venj miz gep baiz hakgaep caeuq ciengjfung vuengz- daeq, “genhswngh”、 “dungzcih”、“cihyen”、“daisijdi”…… baez geq miz baenz 200 lai gep, ca mbouj geijlai ranzranz cungj miz hakgaep, ranzranz cungj dwg ranzhak, mbangj lij venj miz baizdou “bohlwg hanlinz”、“seiq daih gijyinz” dem. Aen mbanj neix youq ciuhgeq 80% vunzmbanj dang hak gvaq, aen mbanjbya iq ndeu, miz baenzlai cinjsw、gijyinz, vanzlij miz baenzlai vunz okbae danghak, mboujdan dang daengz hakhung, ndaw fwngz miz gienz ak, vaizlij bouxboux mbouj yak mbouj maeuz, lenzgez danghak, gijneix caen hawj vunz geizheih haenhdanq.

Aen mbanj neix 2005 nienz ndaej soengq hawj “Cungguek aen mbanj guh lijyouz ceiq mizmuengh ndeu”; 2006 nienz 5 nyied ndaej Gozvuyen goengbouh guh “daengx guek cungdenj vwnzvuz baujhu danhvei”, 6 nyied Gyanghdouzcouh gyaez va’ngaeuz vwnzva ndaej senj haeuj Gvangjsih feihvuzciz vwnzva yizcanj mingzloeg.