Moix bi liggaeuq ndwenseiq coseiq, Sanhgyangh Dungcuz Swciyen Dungzloz Myauzcuz Yangh cungj banh baez ciet vwnzva gingq vaiz ndeu, baenz geij fanh beixnuengx Dung Myauz Yauz dangdieg nem henzgyawj haenx angqvauvau bae camgya gingq caeq vaizsaenz、fungsug minzcuz youzbyaij、yienj heiq diuq foux、huqdoj dangdieg gaicawx doenghgij hozdung lai cungj lai yiengh neix, baijyienj gij vwnzva raeq nazeih Dungcuz, doengzcaez geiqniemh ngoenzseng vaizvuengz, mbaenj ndaw bi rumz dingh fwn yinz, ndaem ciengx demsou. Gwnz gai ndaw hongh, vunz lai vunz daih, nauhyied dangqmaz.

“Ciet gingq vaiz” Dungzloz gaenq lienzdaemh banh baenz 200 lai bi nanz lo, dwg Sanhgyangh ranghdieg Dungcuz Myauzcuz aen ngoenzciet conzdungj mizmingz ndeu, “gingq vaiz” dwg gij cawjdaez ngoenzciet “seiq nyied bet”. Ngoenz neix, gij vaiz ndaw mbanj cungj ndaej cuengqgyaj mbouj yungh daepek, gyoengqvunz goenggingq dwk cing duzvaiz okdaeuj, raek vahoengz hwnj gwnz gyaeuj duzvaiz bae, guh aen yizsi gingq vaiz conzdungj neix, gvej nywjoiq ma gueng vaiz, aeu laeujhaeuxcid gingq vaiz, guh “haexvaiz” (haeuxnaengj ndaem) bwnq duzvaiz. Bouxcawjranz sai goenggingq caensim dwk gungj hwet guh sax, baiqgouz vaizsaenz, muengh de baujyouh duzvaiz ndaw ranz mbouj baenzbingh mbouj oksaeh、maj ndaej bizbwd cangqcwt rengz ak, mbaenj ndaw bi yienghyiengh guh ndaej swnh ndaem ciengx demsou.

Ngoenzciet, Dungzloz Myauzyangh cawz guh aen hozdung “gingq vaiz” hoenghhwd le, lij banh gij hozdung saujsu minzcuz bae bo daegbied gag miz neix. Vunzlai bae daengz Boginzsuz gawjhengz haeuj bo yizsi, gyoengq daegmbauq dahsau Dungcuz Myauzcuz cangndang gyaeuget ndeiyawj, doxiu guhdoih doiq fwen、angqyangz caez ndaem golimz、siengqra bouxhabsim bonjfaenh; gyoengq mehmbwk cix daenj gij buhvunj gyaeundei bingzseiz mbouj sij ndaej daenj haenx mbangj yienj dajsiuq mbangj camgya diuq foux; gyoengq vunzlaux caemh daenj dwk moqsup ronghlwenq bae yawj roeg doxdoj byaij gai dajcawx, lwgnyez cix daenj dwk vava loegloeg doxlaeh guh’angq yawj nauhyied; miz aen doih “gahgouh” daegbied ndeu byaij gvaq gai ndonj haeuj mbanj, daengz gizlawz gizde couh nauhyied gyukgyad, gij vunz ndaw doih neix daenj buhvaq rengqret vaihvad、naj ndaemndet yienghsiengq coujcaq,loengh riu guh gvaiq, nyex vunz hemq riu; gyoengq hekyouz baenz bang baenz gyoengq dwk con gai haeuj mbanj, yawjngonz gak cungj hozdung, cawx saek di huqdoj dangdieg, youq ndaw angqyangz nauhyied youh lai rox di fungsug fungcingz Dungcuz Myauzcuz daegbied gag miz de.