Vihliux cungjgez gyaulouz Cuengh Gun song vah saw gyauyuz ngeih loih mozsi sonhag gingniemh, daezsang lauxsae Cuengh Gun song vah saw sonhag suijbingz, coicaenh hong sawqniemh Cuengh Gun song vah saw sonhag yamqonj gaihcanj, 5 nyied 30 hauh, Swcigih Gyauyuz Dingh youq Dwzbauj Yen gawjbanh 2014 nienz Cuengh Gun song vah saw sonhag yenzdauj hozdung (vahdeihfueng dieg baihnamz). Miz Cuengh Gun song vah saw gyauyenzyenz、guzgan lauxsae Sawcuengh gij hagdangz Cuengh Gun song vah saw saedhengz ngeih loih mozsi sonhag sawqniemh dieg baihnamz 15 aen yienh (si、gih) haenx, nem Gvangjsih Minzcuz Gyauyuz Fazcanj Cunghsinh、Gvangjsih Swhfan Yozyen Gyauyuz Yoz- yen boux lauxhangz yozcej、Sawcuengh gungh 80 lai vunz camgya baez yenzdauj hozdung neix.

Banhaet, gyoengq boux daeuj camgya hoih yenzdauj haenx, dingq le Duh’anh Yangh Cunghsinh Siujyoz Lij Yozyingj lauxsae hwnj goq sifan Sawcuengh sonhag it nienzgaep《Beij Coengmingz》caeuq Dangz Munglanz lauxsae hwnj goq sifan Sawcuengh sonhag banyawhbwh 《Ad Aed》. Lij Yozyingj lauxsae hwnj goq《Beij Coengmingz》, sonhag lohnaemj yienhsag, de sien gik gij yinxdaeuz hagseng, dawz hagseng yinx haeuj ndaw saw, hawj hagseng hag cihmoq, caiq dawz Sawcuengh、Sawgun caeuq vahdoj bonjdieg giethab hwnjdaeuj, sien aeu byauhcunj Sawcuengh daeuj gejnaeuz eiq- sei cihmoq, caiq aeu vahdoj bonjdieg daeuj gejnaeuz eiqsei cihmoq, bang hagseng lijgaij eiqsei faenzcieng. Dangz Mung- lanz lauxsae son goq《Ad Aed》 neix, aeu guh’angq hingzsik daeuj gikfat gij yinxdaeuz hagseng. De haidaeuz yungh ciengq go yinx hagseng haeuj ndaw saw, doenggvaq guh’angq nyinh cihmoq, doeg cihmoq; doeklaeng aeu ciengq go guh satbyai, gwnz dangz hozyoz raixcaix. Song boux lauxsae sezgi gwnzdangz sonhag gig miz gohyoz, sonhag hingzsik sengdoengh vaiqvued, cungfaen langhbaij le aen sonhag lijnen “Angqyangz Sawcuengh” neix, ndaej daengz daihgya haenh ndei.

Swcigih Gyauyuz Dingh Minzcuz Gyauyuz Fazcanj Cunghsinh cujyin Couh Gwzyih youq gwnz hoih guh cungjgez gangjvah seiz, cungfaen haengj- dingh le baez hoih yenzdauj aeu ndaej cingzcik neix, de naeuz, doenggvaq guh baez gyauyenz hozdung neix, sawj daihgya caenh’ itbouh roxnyinh caeuq cangjvuz Cuengh Gun song vah saw ngeih loih mozsi gij sonhag sawqniemh muzbyauh lijyen yauhgiuz、saedhengz fuengfap. Couh cujyin lij naeuz, daj 2012 nienz hwnj, Cuengh Gun song vah saw gyauyuz gaenq haeuj seiz hoenghhwd fazcanj. Dangqnaj, doih lauxsae soqliengh caeuq cizlieng dwg diuz rap naek ndeu, doiq gij gunnanz neix, raeuz aeu miz saenqsim、miz naihsim、 miz gietsim bae guh, gou saenq aen hong neix, youq daihgya caez roengzrengz baihlaj itdingh yied guh yied ndei.