Bi haenx ngoenzciet “roek it”，boux caencik ndeu dwk dienhvah daeuj naeuz gou nyi, de dawz di doxgaiq lwgnyez gwn ndeu geiq aen cimienhbau ndeu daeuj hawj dahlwg iq gou, daengq gou youq bakdouranz deq ciepsou. Aen ci haenx, dwg ci danhvei boux caencik haenx, cienmonz ciepsoengq vunz hwnjban roengzban, ngoenzngoenz lohgvaq bakdou ranz gou, gou baez raen couh nyinh ndaej ok aen ci neix.

Yaep yiet, aen ci couh youq bakdouranz gou dingz roengzdaeuj, gou ndwn youq baihgvaz ci, daj cuengci couh yawjraen gij doxgaiq haenx cuengq youq ndawci baihswix.

Aenci neix, baihlaeng miz songbaiz daengq, song dahsau naengh youq baiz daih’it, gij doxgaiq haenx couh youq henzdin songde.

Song dahsau neix, gou roxnaj, gyoengqde cungj dwg youq camhsoungaenz goengloh sou ngaenz.

Gou naeuz: Dahnuengx sou dawz gij doxgaiq haenx ndenq gvaq daeuj hawj gou mbat ndeu vei.

Song dahsau mbouj oksing. Boux ndeu mazmwnh dwk yawj roen baihnaj, lingh boux aengyaeuj ngengq gwnz eijci, fouqda de yaek laep mbouj laep, mbouj miz byawz leixlangh gou. Seizneix gou miz di mbouj ndei eiqsei, caemhcaiq mizdi geizheih: Aen danhvei gyoengqde dwg fuzvu hangznieb, bingzseiz cungj dwg dizcang“riunyum fuzvu”, seizneix song dahsau neix baenzneix damhdingh, daj gij byaujcingz songde gou lij yawj ndaejok songde miz di ndaengqcawq dem. Seizneix gou mbouj rox baenzlawz guh ndei. Gou rox, seizhaenx dwg seiz roengzban, songde mbouj itdingh aeu guh“riunyum fuzvu”, gou hix mbouj miz leixyouz yiugouz songde hawj gou“riunyum”, hoeng, daj laexmauh fuengmienh daeuj gangj, cix mbouj wnggai baenz neix damhdingh ba?

Gou nyengh yaep ndeu, boux haici haenx raen baihlaeng mbouj miz vunz dapwngq gou, cix naeuz, mwngz byaij gvaq mbiengj ndeu bae gag hai douci gag aeu ba. Gou naeuz, ndei.

“Byaij gijmaz byaij, daj cuengci ndenq okbae mbouj ndaej la?” Mwh gou yaek cienq ndang byaij seiz, dingqnyi sing miz vunz gangjvah, seizneix gou cij rox lij miz vunz naengh youq baihlaeng song dahsau, gou baez yawj, laxlawz dwg dahcej seiqcib lai bi ndeu.

Dahcej doq gangj doq gungjhwet ndwn hwnj, dinfwngz riengjri dwk dawz gij doxgaiq haenx daj dangqnaj song dahsau haenx ndenq hawj gou, gou gamjdoengh dwk laebdaeb gangj geijcoenz“gyo’mbaiq”.

Seizhaenx, song dahsau neix lij dwg gij yiengh“saeh mbouj gvan gou, mbouj leix mbouj langh”haenx. Gizsaed, songde mbouj yungh doengh din hix mbouj yungh doengh ndang couh guh ndei gienhsaeh neix, hoeng……

Ci hai bae gyae lo, gou cix lumj fatbag nei ndwn youq giz haenx, baenzlawz cungj siengj mbouj doeng: Mouj dwg gienh saeh yietfwngz couh guh ndaej ndei ma? Baenzlawz mbouj haengj guh ne?

Nyienh gwnzbiengz laedoengh lai di raeujrub, noix di sim damh naj saep! Yienghneix, seiqgyaiq couh engqgya maez vunz lo.