Moix bi liggaeuq ndwen- cieng ngeihseiq, Vujmingz Yen Lozhih Cin Haweng caeuq Mbanjeng song aen cunh neix cungj angqyangz gvaq ngoenz- ciet hawmiuh, gyoengq vunz- mbanj song aen cunh neix cungj cingj caencik baengzyoux daengz ndaw ranz, loengh byaek gwn ngaiz, bae diegdangz yawj eu fwen diuq foux, guh yienjheiq、guh’angq gak cungj conzdungj hozdung, nauhyied dangqmaz.

Hawmiuh dwg youq Haweng、Mbanjeng song aen cunh doengz- caez banh, ndigah heuhguh “hawmiuh song Eng”. “Hawmiuh song Eng” hainduj dwg heuhguh cietguhgai, vih hawj ngoenzciet engq mizmingz engq nauhyied, geij bi gonq ginggvaq vunzlai doxyaeng gvaq le cij gaij heuhguh “hawmiuh song Eng”, gaenq lienzdaemh banh baenz 500 lai bi, dwg hangh hozdung beix- nuengx Bouxcuengh singq Buen song aen mbanj neix niemhngeix goengcoj、mbaenj vunz ndaw ranz bingzan、muengh ndaem ciengx demsou ndeu, gig miz daegsaek minzcuz, baijyienj ok gij yiengh- nduj simsoh lauxsaed ciuhgeq vunz dangdieg, caemh dwg beix- nuengx saujsu minzcuz Vujmingz Yen ngoenz ciet conzdungj minzcuz gig miz daegsaek deih- fueng ndeu.

Gyoengq beixnuengx song aen mbanj neix cungj dangq ngoenz ciet neix dwg ndaw bi aenciet ceiq hoenghhwd ndeu, ngoenz neix gij lwgmbwk haq okbae haenx cungj daiq gvan daiq lwg dauqma ranzmeh, gij vunz- mbanj youq baihrog guhhong haenx hix maranz caemh cingj baengzyoux、doengzsaeh caez bae guh’angq, ndaw ranz hek yied lai cawjranz caemh yied sim’angq. Baenzneix, ngoenzde sam seiq fanh vunz daj ndaw cin caeuq cibgeij aen yanghcin henzgyawj nangq daengz Sanglinz、Majsanh、Lungzanh、Yunghningz daengj dieg daeuj haenx caenx dwk ndaw mbanj ndaetfwdfwd lumj ngoenz- haw nei, nauhyied hoenghhwd raixcaix.

Ngoenzciet, ndaw mbanj hozdung miz lai cungj lai yiengh, caeqbaiq goengcoj ram siengq goengcoj byaij mbanj soengq fuk hozdung soengq hawj vunzmbanj faenh siengjmuengh ndeu, yienj heiq、doiq fwen caeuq yienh- ciengz daem ceizet hawj vunzlai humx yawj ndaetfwd; gaeq doxdoj、roegvenz doxdoj、bengcag、duedgaeb yiengzbya daengj doxdax hozdung hawj vunzlai yawj dwk nyaepsadsad; ciengz soemq gaeq hozdung caenh boux mehmbwk gaenq baenzgya caengz mizndang senglwg haenx ndaej camgya neix, eiqsei de dwg hoh mehmbwk daengzcog lwg lai ranz hoengh, ndigah mwh soemq gaeq hix gig nauhyied yinx vunz sing riu daemx mbwn…… Gij hozdung neix cungj dwg vunzmbanj gag comz ngaenz gag anbaiz banhguh, ciengzmienh hoenghhwd vunzlai sim’angq, sing riu sing hemq haprwenz byonghmbwn gwnz mbanj, hawj vunzlai ndaej rox, aenmbanj yaek daihdaih hoengh doxbae.