Aen diuyenzcuj youz bouxduzyoz (bouxvunz guenjleix hong gyauyuz) guekgya Dahcazsih guh cujcangj, Gyauyuzbu Minz- cuz Gyauyuzswh、Minzcuz Gyauyuz Fazcanj Cunghsinh、Cunghyangh Den’gyaugvanj、Guekgya Minzveij Gyauyuz Gohgiswh、Cunghyangh Minzcuz Dayoz lienzhab gyoebbaenz neix, 5 nyied 14 hauh bae daengz Vujsenh Yen diuyenz minzcuz gyauyuz、Cuengh Gun song vah saw gyauyuz、gyauyuz swhyenz gensez daengj cingzgvang.

13 hauh banringzgvaq, diuyenzcuj youq Laizbinh Si dingq yienh gyauyuzgiz lwnh mizgven minzcuz gyauyuz cingzgvang veibau gvaq le, haenh gij guhfap caeuq gingniemh Vujsenh, nyinhnaeuz Vujsenh yawjnaek hong minzcuz gyauyuz、Cuengh Gun song vah saw gyauyuz、gyauyuz swhyenz gensez, hong minzcuz doxgiet gyauyuz onjwt riengjret guh baenaj, maqmuengh Vujsenh Yen gaemdawz aen gihvei ndei neix, youh ndei youh vaiq dwk fazcanj minzcuz gyauyuz.

14 hauh, diuyenzcuj bae daengz mbangj minzcuz yozyau guh saeddeih diuyenz. Youq yienh minzcuz cunghyoz, diuyenzcuj conhgyah haenh gij daegsaek vwnzva Bouxcuengh caeuq gij byauhcunjva gensez hagdangz doxyungz doxhab ndaej gig ndei. Youq Vujsenh Yen Cuengh Gun song vah saw gyauyuz gihdi ——Dungzlingj Cin, diuyenzcuj faen guh song cuj, cuj ndeu bae Sinhlungz Siujyoz, cuj ndeu bae Sinhlungz Siujyoz Liengzdenz Gyauyozdenj. Song cuj conhgyah faen loh haeuj godangz bae dingq goq Cuengh Gun song vah saw sonhag. Youq gwnz dangz, haujlai conhgyah yienznaeuz dingq mbouj rox Vahcuengh, hoeng, cungj doiq gij mozsi Cuengh Gun song vah saw sonhag mizyinx. Seiz roengzdangz, mbangj conhgyah bae cam hagseng, liujgaij gij yaugoj hagsib. Mbangj conhgyah bae cam lauxsae, liujgaij gij siengjfap caeuq gamjsouh sonhag.

Seiz roengzdaengz guh- caemz, diuyenzcuj humx yawj hagseng diuq foux faexsaux、ringx gengxdiet doenghgij hozdung miz minzcuz daegsaek neix, roxnyinh mizyinx raixcaix.

Gyoengq conhgyah diuyenz- cuj mbouj lau dwgrengz dwk bae daengz hagdangz haeuj gyausiz、bangunghsiz、gunghnwngzsiz bae, yawj hwnjdangz, cam aeu yigen caeuq genyi, caemh conyinx yaek baenzlawz guh hong minzcuz gyauyuz ndaej engq ndei, yungh ndei gyauyuz swhyenz coicaenh gij vwnzva gyauyuz dieg saujsu minzcuz fazcanj baenaj.

Swcigih Gyauyuzdingh Minzcuz Gyauyuz Fazcanj Cunghsinh cujyin Couh Gwzyih、Vujsenh Yen Yinzminz Cwngfuj fuyencangj Vuh Siginh buenx diuyenzcuj bae diuyenz.

(韦启念 / Veiz Gijnen 李 振 / Lij Cin 陆鸣笛 / Luz Mingzdiz 覃善笑 / Cinz Sansiu ingj 甘说文 / Ganh Sozvwnz sij/hoiz)