Laj dinbya Byacwx sing gyonglaz yiengj “bungbung”, henz dah Dahcinghsuij sing go goksagsag. 5 nyied 19 hauh daengz 25 hauh, 2014 Nienz “Ngoenz Lijyoz Cungguek” Nanzningz Cujveicangz Nem Sanglinz Ciet Swnghdai Lijyouz Ciengxndang youq Sanglinz Yen gawjhengz.

Sanglinz Yen funghgingj gyaeundei, miz aen Dalungzhuz ndaej heuhguh “Gveilinz gwnz raemx” haenx, miz aen Byacwx vunz heuhguh byasien haenx, miz Sanhlij·Yangzdu funghgingj doenghnaz gyaeundei haenx. Aen yienh neix, aenvih hoengheiq singjsien, bouxlaux souhyienz gig lai, seizneix, daengx yienh miz 60 boux bouxlaux 100 bi doxhwnj, 90 bi doxhwnj miz ndaej 1100 boux, bi 2012 ndaej bingzguh “Mbanjgyaeunanz Cungguek”.

Sanglinz Yen cawz liux funghgingj gyaeundei le, lij miz minzsuz vwnzva laegna noengznwd. Ciet Gyaeunanz、Ciet Meh- lungz Vwnzvacez、Ciet Duhozgungh、Ciet Daznuj daengj vwnzva Bouxcuengh、Yauzcuz gig miz daegsaek haenx sawj vunz danqhaenh dangqmaz.

Youq haimuq ngoenzde, minzsuz byaujyenj hozdung ceiq doedok yienhda, miz 60 vunz gyoebbaenz aendoih eu fwen gingqlaeuj hawj bouxhek, diuq foux- faexsaux; miz 120 vunz gyoebbaenz aendoih duzlungz caeq meh, gyoengqde foux- duzlungz, duzlungz yaep ndeu ndaem aengyaeuj haeuj laj raemx bae, yaep ndeu bongh aengyaeuj hwnjdaeuj. Yienj duzlungz caeq meh, dwg lwnh aen goj guhhengz saehndei、hauqgingq bohmeh ndeu; miz 100 boux vunz gyoebbaenz aendoih yienj va- ngaeux soengq souhyienz, biujdap aeueiq、gamjaen “goenggyaeunanz”; miz 80 vunz gyoebbaenz aendoih yienj eu fwen Yauzcuz、roq gyong Yauzcuz, biujyienh le gyoengq lwgminz Yauzcuz coengmingz、gaenxguh maenh’ak, biujdap aen sim maqmuengh、 angq gvaq saedceij vuenyungz gyoengqde haenx.