Lwgminz gaemgienz le, dangj caeuq cwngfuj roengz gvaq haujlai rengz, bangcoengh vunzlai dieglaux gaijgez gij haemzhoj guh hong caeuq gwndaenj. Hoeng, aenvih doenghbaez deng buqvaih haenq lai, caiq gya hwnj gij diuzgienh mbwndeih gizneix yakrwix, seizneix gij dieg neix lij haemq hoj.

Gij dieglaux Guengjsae, dingzlai cungj dwg dieg minzcuz vunznoix comzyouq haenx, caemh dingzlai dwg dieg byarin. Gizneix vunz youq sanq lai, dieggeng noix, namh youh byom, miz mbangj dieg aeu rap namh hwnj bya, doek ceh youq ngabrin, hwnjguh suijli nazreih yaez, gig nanz ra deng raemx. Gij diegbya neix aenvih souh gij dieghingz gahswhdwz yingjyangj, bibi seizdoeng raemxlajdieg roengzgyangq, gij raemx gwnzdieg cix mbaet, vunz caeuq doihduz cungj nanz ndaej gwn raemx. Bi 1964, Doenglanz、Fungsanh、Bahmaj sam aen yienh neix, gyonj miz vunz 38.64 fanh vunz, gij vunz neix miz 11 fanh lai vunz youq gij diegbyarin, gyoengqde aeu yungh vunzguhhong 20% doxhwnj bae rap raemx, baedauq ngeih sam cib goengleix. Mbangj ranz mbouj miz vunzguhhong, cij ndaej ok ngaenz cingj vunz bang rap raemx. Gih Dunghsanh Yienh Bahmaj dwg aen dieggoek gwzming bihaenx genhciz doucwngh haemq nanz ndeu, bi 1962 gvaq cieng, gij dieg wnq dwg faen noh faen nienzhuq, gizneix dwg faen raemx, ginzcung boux 3 gaen, ganbu boux 5 gaen. Faenh raemx lai yungh dingz yienhsiengq neix gig lai, vihneix mboujnoix vunz cix baenzbingh lo.

Ginggvaq lai bi hwnjguh, dieglaux gyaudoeng ndaej gaijndei di le, hoeng ciuqyiengh saek lai. Yienh Denzyangz suenq dwg giz dieglaux gyaudoeng lai ndei di ndeu, daengz bi 1964 sojmiz gij gunghse lij miz 35% lienz roenmaxdoz cungj mbouj miz. Gyaudoeng mbouj- bienh, doxgaiq yinh mbouj ndaej haeujbae, doxgaiq nungzfu caemh yinh mbouj ndaej okdaeuj, vunzlai bonjdieg guh hong caeuq gwndaenj gig haemzhoj. Gih Gyanghnanz Yienh Duh’anh miz boux seyenz, vihliux gai duzmou ndeu, goq le 12 boux vunz yungh cag diuq duzmou gvaq dat, yungh le 5 ngoenz cij yinh daengz gungsiuhse. Baksaek、Denzdungh、Denzyangz、Bingzgoj seiq aen yienh neix, bi 1963 couh miz 3000 lai dun huqdoj yinh mbouj ndaej okdaeuj, gyu、hojyouz caeuq habfeiz daengj doxgaiq ngoenzyungh neix ciengz cawx mbouj ndaej.(caengz sat)