Dahmeiz dayoz bizyez seiz couh heuh Naxlanz guh meh, mbouj caiq heuh guh nax lo.

Naxlanz dwg mehnax Dahmeiz, yienznaeuz ngamq ndaej 45 bi, hoeng yawj hwnj bae cix lumj gaenq 50 lai bi nei, naj nyaeuq byoem hix miz di hau lo.

Naxlanz 20 bi seiz, dahcej deng ci daemj dai lo, seiz haenx dahlwg dahcej Dahmeiz ngamq ndaej bi lai. Daxmeh dai le, Dahmeiz ngoenz hwnz daej ra daxmeh, daxboh mbouj rox baenzlawz guh ndei. Naxlanz sim’in Dahmeiz, hix doengzcingz cejfou, couh dawz Dahmeiz ciep daengz ranz daiq daeuj, de camh dang daxmeh Dahmeiz. Gvaq bi ndeu le, cejfou caiq aeu yah lo, Naxlanz laihnaeuz Dahmeiz mbat neix miz meh ciuqgoq lo, couh dawz Dahmeiz soengq bae ma ranz. Hoeng caengz daengz sam ndwen, cejfou youh dawz Dahmeiz daeuj hawj Naxlanz, cejfou naeuz mehyah de mizndang lo, mbouj fuengbienh ciuqgoq Dahmeiz, Dahmeiz lij dwg cingq Naxlanz bang ciuqgoq, caj mehyah de seng lwg gvaq le caiq daeuj ciep Dahmeiz baema. Yienghneix Dahmeiz youh caiq caeuq Naxlanz gwn youq lo.

Youq bi ndeu gvaqbae lo, Naxlanz dawz Dahmeiz soengq bae hawj daxboh de, Dahmeiz couh riengz daxboh caeuq mehlaeng caemh youq lo. Danhseih, mehlaeng doiq Dahmeiz mbouj ndei, ciengz ndaq ciengz moeb Dahmeiz, daeglwg swhgeij gwn ndei daenj ndei, Dahmeiz cix gwn gij lw daenj gij rwix.Hainduj, daxboh lij naeuz mehlaeng geij coenz, hoeng ciemhciemh couh caih mehlaeng ndaq moeb Dahmeiz lo. Naxlanz raen yienghneix, de mbouj siengj hawj Dahmeiz baenzneix ngaiz nyoegnyamx,cijndei youh ciep Dahmeiz daeuj caeuq swhgeij youq lo. Daj neix hwnj, Dahmeiz couh mbouj caiq baema ranz swhgeij gvaq, ranz Naxlanz couhdwg ranz de, Daxboh de hainduj lij daeuj yawj de geij baez, ciemhciemh couh mbouj caiq daeuj yawj de lo. Nanz le daxboh couh lumz miz Dahmeiz dahlwg neix, Dahmeiz hix mbouj caiq dwen daxboh gvaq lo.

Naxlanz gietdingh dawz Dahmeiz dang lwg ciengx, vih neix dang yahmoiz hwnj ranz cam yah seiz, de naeuz de aeu daiq Dahmeiz haq gvaqbae, vihneix mbouj miz vunz nyienh aeu de. Raen yienghneix, Naxlanz couh mbouj haq lo, de caeuq Dahmeiz doxing doxbaengh gvaq saedceij.

Vihliux dawz Dahmeiz ciengx hung, hawj de lumj lwgnyez ranz bouxwnq nei, gwn imq daenj raeuj ndaej doegsaw, de sinhoj dwgrengz, hoeng cix mbouj ienq saek coenz. De cungj dwg ngoenz nyaengq daengz laep, couhcinj seizhoengq hix mbouj raen de ndaej yietnaiq gvaq.

Naxlanz lumj daxmeh ityiengh, baenzlawz hoj hix aeu soengq Dahmeiz doegsaw, Dahmeiz swnhleih doeg sat siujyoz caeuq cuhcungh. Cuhcungh bizyez seiz gauj ndaej si gauhcungh, hoeng bae daengz ndaw si doeg gauhcungh aeu yungh haujlai cienz, ndaw ranz baenz hoj, bae lawz aeu cienz ni, siengj daengz neix, Dahmeiz mbouj rox baenzlawz guh, de ngeix bae ngeix dauq, gietdingh mbouj doegsaw lo, de ngeix, danghnaeuz mbouj doeg gauhcungh lo, youq ranz guh hong, Naxlanz couh mbouj yungh baenz sinhoj lo. Yienghneix haemh ndeu gwn caeuz seiz, Dahmeiz couh doiq Naxlanz yaek gangj yaek mbouj naeuz:“Nax, gou……gou mbouj siengj doegsaw lo, gou……” Dahmeiz caengz gangj sat, Naxlanz couh doiq Dahmeiz fatheiq lo, de dawz gouh dawh bongx roengz gwnz congz bae naeuz:“Mwngz naeuz gijmaz? Mbouj doegsaw? Gou baenzneix sinhoj dwg vih byawz ha, couhdwg vihliux hawj mwngz miz ceiqheiq, mwngz seizneix cix naeuz mbouj siengj doegsaw? Mwngz siengj gik dai gou ha?” Gangj le Naxlanz hwnq ndang haeuj ndaw rug bae, gaendwk couh dingqnyi sing daej Naxlanz daj ndaw rug cienz okdaeuj. Dahmeiz raen yienghneix lau lo, de coengzlaiz mbouj raen Naxlanz baenzneix hozndat gvaq, hix mbouj raen Naxlanz baenzneix siengsim gvaq, de mbouj rox baenzlawz guh ndei, de byaij haeuj ndaw rug bae, dinghdingh ndwn youq henz ndang Naxlanz buenx de lae raemxda.

(caengz sat)