“Nazbaq fwen haprwenz, daihdaih cienz roengzdaeuj; hawfwen fathwnj caeux, lwnhnaeuz lizsij geq.” 4 nyied 15 hauh liggaeuq ndwensam cibloeg, aen ciet vwnzva hawfwen “3·16 haeuj gamj” Nazbaq moix bi banh mbat ndeu neix youq gih raeuz Lingzyinz Yen Cauzlij Yauzcuz Yangh Mbanjnazbaq hoenghhwd banh baenz, cawz vunzlai dangdieg le, lij miz Gvangjsih Cazgidonz、Fungsanh Yen、Denhngoz Yen、Denzlinz Yen、Lozyez Yen daengj 12 aen doihbiujyienj bae dem nauhyied, dawz daegsaek deihfueng Heiqcuengh biujyienj、fwen gak dieg doxdoiq、cazgi、gofoux ciuhneix yungzhab hwnjdaeuj, aeu fwen cienz cingz, aeu foux cimh youx, cezmuz neiyungz lai cungj lai yiengh, hawj fanh lai boux vunzmbanj dangdieg henzgyawj caeuq bouxhek diegwnq yawj dwk maezmwd deihdeih hemq ndei.

Ciet hawfwen “haeuj gamj” Cauzlij Yauzyangh, dwg daj ganj hawmiuh bienq gvaqdaeuj, ginggvaq hwng riuz baenz bet bak lai bi, gyonjcomz dwk yienjok gij vwnzva minzcuz baihsaebaek gih raeuz. Moix bi liggaeuq ndwensam cibloeg, Cauzlij Yauzyangh gak cuz beixnuengx cungj gag doxiu dwk comz youq geij aen mbanj henz dah haenx banh cietfwen, ciemhciemh couh baenz le hawfwen. Gyoengq mbauqsau caengz baenzgya haenx youq doenghnaz luegbya, henz rij henz dah con bae ndonj dauq, ra doih doiq fwen, siengq bouxvunz hab’sim bonjfaenh; gij vunz gaenq baenzgya haenx, cix ndaej youq gwnz hawfwen caeuq bouxyoux doxraen caemhcaiq doiq fwen, lwnh gij cingz siengjngeix, ndigah hawfwen caemh heuhguh “gai funglouz”. Bineix hawfwen “haeuj gamj” Cauzlij faenbied youq Nazbaq、Rogsok、Bingzgvangq、Nazhoz seiq aen mbanj doengzseiz hoengh banh, ndawde Mbanjnazbaq dwg ceiq nauhyied, gij heiqduenz ndawbiengz Lingzyinz、Lozyez、Fungsanh、Denzlinz、Bwzswz daengj dieg angq bae yienjheiq、doiq fwen, Gvangjsih Cazgidonz caemh bae daengz ndaw mbanj yienj cazgi, gij heiq ndeiyawj cit dem cit yienj mbouj sat, hawj vunzlai yawj dwk sim’angq dangqmaz.

Ngoenzciet, Heiqcuengh biujyienj、doiq fwen doxdax、cazgi biujyienj doenghgij hozdung miz daegsaek minzcuz neix, hawj vunz humxyawj caengz dem caengz ndaetfwdfwd, gij Heiqcuengh mbiengjbaek Cauzlij youz nungzminz dangdieg gag bien gag lienh gag yienj haenx, baenz le cit cezmuz baujlouz conzdungj vunzlai ceiq maij yawj ndeu. Hamq dah Cauzlij baenz ngoenz vunz lai vunz daih, sing fwen sing go sepset rwenzred, biujyienj ndeiyawj yinx vunz. Gyoengq vunzmbanj caeuq bouxhek youq ndaw hawfwen angqyangz cwxcaih youzlangh, gamjsouh gij vwnzva hawfwen “haeuj gamj” Cauzlij daegsaek daegbied caeuq diegwnq mbouj doxdoengz neix, angqvauvau mbouj sij dauqbae.