5 nyied 2 hauh ngoenz liggaeuq ndwenseiq coseiq, aenciet “seiq nyied seiq” Bouxcuengh mbaenj fungsou nem youzyawj vwnzva fungsug Loegyied youq Vujmingz Yen Maxdaeuz Cin Loegyied Vwnzva Gvangjcangz banh ndaej hoenghhwd. Bouxdaeuz mbangj danhvei、 bouxlauxhangz、bouxguhseng’eiq nem bouxhek caeuq gyoengq vunzlai dangdieg Maxdaeuz doxcomz dwk angqyangz gvaq ngoenzciet.

Ciuq bouxlauxhangz cazyawj Maxdaeuz Cin Boyenzlungz、diegmoh ciuhgeq Andaengjyangh caeuq gij mohgamj henzgyawj le nyinhdingh, Maxdaeuz dwg gyangsim aenguek ciuhgeq Loegyied, dwg giz fathwnj vwnzva Loegyied, gizneix lij riuz miz haujlai fungcingz minzcuz caeuq gojriuz ndawbiengz gaeuqgeq daeg- bied gagmiz de. Gingsanh Cunh dieg youq gyangsim gueklaux Loegyied, miz aenmiuh daihvuengz cunghfuj Loegyied、dieggoek riuzcienz Meh- lungz、hawfwen Loegyied, diegce mohgamj Gamjganjdauh caeuq aennyenz Loegyied doenghgij celouz neix, hawj vunz cungj siengj bae damqra gij rizgeq de. “Seiq nyied seiq” ciet mbaenj fungsou daj ciuhgeq couh miz, ngoenzde dangdieg gak aen mbanj cungj guh yizsi caeqbaiq saenzbuz, mbaenj saenzcoj roengzfwn、baujyouh haeuxnaz fungsou. Gingsanh Cunh daj ciuhgeq daeuj moix bi yaek ndaemnaz gaxgonq cungj bwh ndei haeuxnaengj、laeujhaeuxcid, cingj goengsae daeuj caeq saenz gouz fwn, comz ngaenz cingj heiqduenz daeuj yienjheiq comz dwk caj fwn, gij hozdung eu fwen、roeg doxdoj daengj caemh menhmenh hwng riuz daengz seizneix.

Ngoenzciet, hozdung miz lai cungj lai yiengh, vunzmbanj caeqbaiq daihvuengz cunghfuj Loegyied、ram Mehlungz cunz mbanj caeq naz caeq six、caeq naz mbaenj fungsou yizsi、hawfwen fungcingz Loegyied hozdung、vwnzyi biujyienj caeuq foux lungz foux saeceij nauhyied raixcaix; eu fwen doiq fwen、dwk lwggyangq、dwkdomq、sam vunz bengcag、aemq raemx dingj faexmbaenq、Bouxcuengh ma ranzmeh、aeu aengonh gonh raemx doxdax、dwk geizsam、dwk geizguk、gaebbya doxdax daengj hanghmoeg fungsug ndawbiengz mizyinx raixcaix, hawj vunz simhumz nywgnywg doxcanj bae camgya, sing hemq gyayouz caeuq sing riu sing bek fwngz haprwenz ndaw luegbya.